Mister na nairita sa bungangerang misis, nagbigti

Upang hindi na umano marinig ang matinding pagbubunganga ng kanyang misis na isinalubong sa kanya matapos ang pamamasada, isang tricycle driver ang nagpasyang wakasan ang kanyang buhay sa pamamagitan ng pagbibigti, kamakalawa ng gabi sa Mandaluyong City.

Nakilala ang biktimang nasawi na si Salvador Beldan, 24, may-asawa at residente ng #634 Evangelista st., Pleasant Hills, Mandaluyong City.

Ayon kay PO3 Felipe Tumibay, may hawak ng kaso, umuwi umano dakong alas-8 ng gabi ang biktima mula sa maghapong pamamasada.

Sa halip na asikasuhin naman siya ng kanyang misis na si Myrna, pagbubunganga umano ang isinalubong nito dahil sa naintrega niyang maliit na kinita.

Dito na nag-umpisang magsigawan ang mag-asawa ngunit sa bandang huli ay ang lalaki rin ang sumuko sa pagbubunganga ng kanyang misis.

Galit umano na nagkulong sa kuwarto ang biktima at hindi na kumain pa ng hapunan.

Nag makapag-isip, dito na nag-alala si Myrna sa kalagayan ng kanyang mister at kinatok ito upang yayaing kumain ngunit bumulaga sa kanya ang nakabiting katawan ng kanyang mister sa loob ng kuwarto. (Ulat ni Danilo Garcia)