DA, inulan ng bigas, isda at baboy

Pinagbabato ng bigas, mga isda at pata ng baboy ng grupo ng mga ralista ang gusali ng Department of Agriculture (DA) bilang pagkondena sa isyu ng mad cow disease.

Binatikos ng mga grupong Pamalakaya at Kilusang Magbubukid ng Pilipinas ang DA sa pagsabing kailangang itigil na ng pamahalaan ang pag-aangkat ng mga frozen fish, mga produktong karne at bigas dahil hindi nito kayang pangalagaan ang kalusugan ng mga mamamayan.

Binigyang diin ni Rodolfo Sambajon, chairman ng Pamalakaya, na sa halip palakasin ni Agriculture Sec. Leonardo Montemayor ang lokal na industriya ng karne gayundin ng butil tulad ng bigas ay pinapayagan pa umano nito na makapag-import ang bansa ng mga frozen fish at meat products.

Bukod dito ay bilyong piso pa umano ang ginagastos ng bansa sa importasyon ng isda at karne kasama na dito ’yung tinatawag na japayuki samantalang mayroon naman tayong lokal na galunggong na mabibili rin sa kaparehong halaga. (Ulat ni Angie dela Cruz)