Pedicab driver todas sa ligaw na bala

Tuluyan nang hindi nagising ang isang 46-anyos na binata na mahimbing na natutulog sa loob ng pedicab matapos itong mabaril ng dalawang lalaki na nagpaputok sa isang pulis, kahapon ng madaling araw sa Tondo, Maynila.

Namatay habang isinusugod sa Mary Johnston Hospital si Rodolfo Ulep, ng #1055 Dagupan st., Tondo. Nagtamo ito ng isang tama ng bala ng baril sa batok.

Sa pagsisiyasat ni Rodelio Lingcong, ng Western Police District-Homicide Division, naganap ang insidente dakong alas-2:30 ng madaling araw habang papalabas ng bahay si PO1 Nonito Binayug at makarinig ng dalawang putok ng baril.

Nakita ni Binayug ang dalawang suspek na armado ng baril at ng kanyang sitahin ay hindi tumigil ang mga ito at sa halip ay pinaputukan ang pulis.

Hindi tinamaan si Binayug pero minalas na tumama ang bala sa natutulog na si Ulep.

Matapos ang pamamaril ay mabilis na nagsitakas ang mga suspek. Iniimbestigahan ng pulisya na posibleng ang pulis ang target ng mga ito. (Ulat ni Ellen Fernando)