Sirang kalye sa MM uumpisahan nang ayusin ng DPWH

Nakatakdang kumpunihin na ng Department of Public Works and Highways (DPWH) ang mga sirang lansangan sa Metro Manila matapos ipag-utos ni DPWH Secretary Simeon Datumanong kay NCR-DPWH Director Salvador Pleyto na ayusin ang mga kaliwa’t kanan na butas sa Kalakhang Maynila na siyang nagpapasikip ng trapiko.

Kabilang sa mga aayusin ng DPWH ay ang mga nasirang lansangan dahil sa isinasagawang pagkukumpuni ng Philippine Long Distance Telephone (PLDT), Manila Electric Company (Meralco), Manila Water Co. Inc. (MWCI), Maynilad Water Services Inc. (MWSI), Smart, Globe at iba pang telecommunications firms at Cable companies.

Kaugnay nito, nilinaw ni Pleyto na bago gumawa ng hakbang ang mga nasabing kompanya ay nagpapaalam muna sa kagawan ng DPWH pero hindi na naibabalik ang lansangan sa oras na mahukay o masira na ito.

Sinabi pa ni Pleyto na lubhang nakasisira ng mga lansangan sa Metro Manila ang sobrang pagsasagawa ng "diggings" ng mga kompanyang nabanggit upang mailagay ang mga tubo at pagkatapos ay iniiwan na nakatiwangwang ang mga sinirang daan at pinababayaan ng mga taga-DPWH. (Ulat ni Jhay Mejias)