Naagnas na bangkay sa folding bed nadiskubre

Dahil sa pagsingaw ng mabahong amoy, nadiskubre kahapon ng mga tauhan ng Western Police District (WPD) ang bangkay ng isang 68-anyos na lalaki sa loob ng kanyang silid sa Tondo, Maynila.

Batay sa isinagawang imbestigasyon ni SPO1 Danny Vidad ng WPD-Homicide Division, ang biktimang si Raymund Geneblanco, binata, naninirahan sa No. 1103 Narciso St., Tondo, ay nadiskubre ng mga kapitbahay nito na naaagnas na habang nakahiga ito sa kanyang folding bed.

Nabatid na huling nakitang buhay ang biktima noong December 19 sa loob ng inuupahan nitong kuwarto sa nasabing lugar, ngunit mula noon ay di na ito lumabas ng kanyang silid at nadiskubreng ito ay patay na nang mangamoy ang bangkay nito.

Sinabi ng pulisya na posibleng sinumpong ng sakit sa puso ang biktima at dahil sa nag-iisa lamang ito sa kanyang tirahan ay di na nito nagawang humingi pa ng tulong sa mga kapitbahay nito, hanggang sa nalagutan na ng hininga. (Ulat ni Grace Amargo)