Akala'y palyado, baril itinapon, pumutok; sekyu todas

Sa pag-aakalang palyado ang baril, isang lasing na sekyu ang nasawi makaraang aksidenteng pumutok ito ng kanyang itapon habang dumadalo sa isang party sa Parañaque City, kahapon ng madaling araw.

Dead-on-arrival sa ospital si Jessie Custodio, 44, ng Dolphin Security & General Services, ng Pinagbuhatan, Pasig City.

Nabatid na nagbabantay ang biktima sa MACO warehouse ng imbitahan ng ilang kalalakihan sa ginaganap na birthday party. Pinaunlakan ito ng biktima at habang masayang nakikipag-inuman ay kinuha nito ang kanyang service firearm na kalibre .38 at nagpaputok ng ilang beses paitaas pero hindi pumutok.

Sa pag-aakalang sira ang baril ay itinapon ito ng biktima pero pumutok at tinamaan siya sa kili-kili. Narekober ng pulisya ang nasabing baril na may lamang apat na bala at isang basyo. (Ulat ni Lordeth Bonilla)