2 opisyal ng PLM kinasuhan sa Ombudsman

Ipinagharap ng kasong katiwalian sa tanggapan ng Ombudsman ang dalawang opisyal ng Pamantasan ng Lungsod ng Maynila (PLM) dahil sa umano’y pagsasabwatan sa pagwaldas ng perang donasyon para sa naturang unibersidad.

Sinampahan ng kasong anti-graft and corruption ang acting president ng PLM na si Ma. Corazon Veridiano at PLM Open University/Distance Education Program and Institute of Community Health Service and Midwifery coordinator Laura Evelyn Ciabal.

Lumalabas na nagbigay ng donasyon ang Executive Center for Professionals Inc. (ECPI) ng halagang P550,000 para sa PLM.

Kinuha ni Ciabal ang halagang P34,000 bilang cash advance sa Metrobank, habang ang natitirang pera na P516,000 tseke ay ibinigay niya kay Veridiano na idineposito naman ng huli sa ilalim ng kanyang pangalan.

Dahil sa hindi nakaabot ang donasyon sa nararapat nitong benepisyaryo ay nakatakdang ipatawag ng Ombudsman ang dalawa upang magbigay paliwanag sa nasabing akusasyon. (Ulat ni Grace Amargo)