Dalaga grabe sa tama ng ligaw na bala

Kritikal ang isang 21-anyos na dalaga matapos itong tamaan ng ligaw na bala habang nag-aaway ang dalawang grupo ng fraternity, kahapon ng madaling-araw sa Caloocan City.

Ang biktimang si Raquel Muñoz ng 113 9th Ave., West ng nasabing lungsod ay kasalukuyang inoobserbahan sa Chinese General Hospital matapos itong magtamo ng isang tama ng bala ng baril sa leeg.

Patuloy namang pinaghahanap ng pulisya ang suspek na kinilala ni Supt. Eduardo Bayangos, hepe ng Caloocan police station 2 na si Christopher Hernandez, 19, ng 10th Ave. na tumakas matapos ang nasabing insidente.

Lumalabas sa imbestigasyon ng pulisya na dakong alas-12:30 ng madaling-araw nang maganap ang insidente sa panulukan ng P. Galauran st. at 10th Ave. nang magkaroon ng habulan ang dalawang di-nabanggit na fraternities kung saan kabilang dito ang suspek.

Habang nasa kainitan ng kaguluhan ang dalawang grupo ay bigla na lamang nagpaputok ang isa sa mga suspek subalit minalas namang matamaan ng ligaw na bala ang biktima na noon ay namamalantsa sa loob ng kanilang bahay.

Kaagad naituro ng ilang mga nakasaksi ang suspek subalit tumakas ito kasama ang kanyang grupo. (Ulat ni Gemma Amargo)