Paslit todas, ina grabe sa sagasa

Isang paslit ang iniulat na nasawi habang nasa kritikal na kalagayan naman ang ina nito matapos silang salpukin ng rumaragasang van habang papatawid ang mga biktima sa Batasan Hills, Quezon City kamakalawa.

Kinilala ng pulisya ang nasawi na si Homer Pelotendos, 4-anyos habang ang ina nito na si Nenita, 30, ay kasalukuyang nasa kritikal na kondisyon sa East Avenue Medical Center.

Ayon sa ulat ng CPD-Traffic Management Unit, bandang alas-4 kamakalawa ng hapon habang tumatawid ang mag-ina sa tapat ng Batasan Elementary School sa IBP Road ng nasabing lugar nang masalpok ang mga ito ng rumaragasang van na may plakang GGK-641 na minamaneho ni Diosdado Cruz Jr., 54, ng QC.

Sumuko naman ang driver ng naturang van sa mga awtoridad habang isinugod naman sa nasabing pagamutan ang sugatang biktima. (Ulat ni Rudy Andal)