Basura kapitan!

Ang pagpasaka og kaso batok sa kapitan sa barangay Apas tungod sa rason nga wala siya makapatuman sa gilatid nga lagda paghipos sa mga basura sa iyang dapit, usa ka nindot kaayo nga kalamboan ug leksyon sa ubang opisyal sa barangay.

Angay kita nga malipay kon duna pay laing mga opisyal sa barangay nga pasakaan og kaso karong umaabot nga mga adlaw. Nasayod ako nga dili ra kay si kapitan Rosales ang nagpasagad sa katungdanan kabahin sa basura.

Wala ko magpasabot nga ang kapitan sa barangay dili na lang g'yod matulog ug nga tua siya sa tanang dapit sa usa ka higayon aron mabantayan niya nga walay magpataka og labay sa ilang basura.

Apan nasayod ko nga kon ang kapitan sa barangay, mga konsehal, mogamit lang sa serbisyo sa ilang mga tanod aron dakpon ang mga tawo nga magpataka og labay sa ilang basura, sigurado ko nga maglikay na ang uban aron dili madakpan.

Unsaon nga daghang mga opisyal sa barangay, dili man sinsero nga moalagad alang sa kaayohan sa ilang barangay.

Suwayi ra god ninyo og dakop kanang mga tawo nga magpataka lang og labay'g mga basura sa daplin sa karsada, bisan kanang uban nga molabay og basura nga wala gilain-lain kadtong madugta ug dili madugta.

Sa among barangay sa Lorega-San Miguel, grabe kaniadto kay ang mga tawo anha ra mobutang sa ilang basura kilid sa ihawan. Wala nako pasayloa bisan ang among mga opisyal sa barangay.

Sakop ko sa Lupong Tagapamayapa sa barangay Lorega-San Miguel apan gisuwat gihapon nako ang maong problema. Resulta? Gihingusgan sa among mga buotang opisyal ang pagdakop.

Pagkasayod sa katawhan nga dakpon na diay ang magpataka og labay sa ilang basura, aw mihunong na sila paglabay kilid sa ihawan. Karon pwede ka na gani nga anha mokaon sa dapit nga labayanan og basura.

Sa laktud, political will ra g'yod maoy kuwang sa mga opisyal. Unsa'y trabaho sa mga tanod kon dili ninyo padakpon?

Ang mga tanod maoy mga agents to persons in authority diha sa ilang barangay ug may gahum sila pagdakop sa mga makahimo og salaod.

Kon dunay laing mga opisyal nga pasakaan og kaso, tan-awa dili ba mohigpit na ang mga opisyal nato sa kabarangayan.

* * *

May nag-text nako kagahapon. Nagpahibalo nga diha kuno sa isla sa Calitoban, Talibon, Bohol pwerte karon ang pagkuyanap sa shabu.

Ang termino nga pagkuyanap nagpasabot nga daghan ang mga drug pusher nga namaligya og shabu nga wala lang dakpa.

Kinsa ba ang kapitan diha? Capt unsa katinood nga duna kay anak nga nalambigit sa negosyo sa illegal nga drugas?

Ang mga polis kuno nga manganha diha, dili man maka-ek kay paimnon man dayon og hatagan pa og mga manok.

Atensyon mga polis, ang angga sa mga drug pusher diha mao kini. Andoy, Irin, Junnie, Gilbert. Aksyoni ninyo uy.

* * *

Unya, mga polis diha sa Punta Princesa police station, unsa na may progress adtong gireklamo sa usa nato ka magbabasa kabahin sa pagpamaligya og drugas diha sa sitio Kaduloy sa barangay Tisa? Aksyoni na intawon ninyo.

* * *

Gipasakaan na g'yod og kaso sa hukmanan kagahapon ang kanhi treasurer sa barangay Malubog nga mihimo og ghost projects sa kantidad nga P108 mil.

Maayo ra. Ang argumento ni Edwin Villarta nga dili siya maigo sa malversation of public funds kay giulian na man niya sa kantidad ang bag-o nga treasurer sa barangay.

Apan igo gihapon siya sa falsification of public documents kay gipatoo man niya nga duna sila'y mga projects ug may gibayran siya. May mga pirma pa, pastilan g'yong bilyakoha.