Sabotahe sa administrasyon
Samtang nitibugsok nang ratings ni Bise Presidente Sara Duterte, samtang nameligro nang mapalagpot sa Senado si Bato dela Rosa ug samtang supinahan na sa Department of Justice (DOJ) si kanhi Presidente Rodrigo Duterte tungod sa laktod nga pinatyanay sa iyang drug war, saligi ang administrasyon nga maoy mosabotahe sa ilang kaugalingon.
Nahugno nang daan ang pangandoy sa publiko nga may manubag sa patakang gasto sa confidential funds sa ilang atras-abante sa impeachment sa bise presidente, nipunit pa gyod sila og dakong bato–nga ginganlan og 2025 budget–ug gipukpok sa ilang ulo.
* * *
Nakumbinser na unta ang mga magbubuhis nga angayng manubag si Bise Presidente Duterte giunsa niya paghurot ang P612.5 milyones nga confidential funds sa Office of the Vice President (OVP) ug sa Department of Education (DepEd) sa 2022 ug 2023.
Gibasura na unta sa kinabag-an sa 32 milyones nga nibotar sa bise presidente sa eleksiyon sa 2022 ang iyang mga palusot nga video messages, pag-insulto sa Kongreso ug press conferences sa adlawan ug kadlawong dako ug mga panghulga nga naglakip sa pagpatay sa presidente, first lady ug House speaker.
* * *
Pero saligi silang Presidente Ferdinand Marcos Jr. ug House Speaker Martin Romualdez sa paghigot sa ilang kaugalingong liog pinaagi sa higanteng mga laslas sa budget sa kahimsog ug edukasyon ug makalilisang nga pagpaburot sa budget sa ayuda ug pork barrel.
Ambot nagsalig ba lang sa makabungog nilang mayoriya sa House ug Senado ug sa kakurakot sa ilang alyadong mga senador ug mga kongresista. O dili lang gyod makabadlong sa katol sa balhibuon nilang mga kamot.
* * *
Mahimo ra gyod untang madungan ang paglusad sa impeachment ug ang pagpasaka sa dili kapiyansahan nga mga kasong kriminal batok sa mga Duterte, nga mahimong maatol sab sa pagpagawas sa arrest warrants sa International Criminal Court (ICC).
Pero salamat sa kapakyas sa administrasyon sa pagtago sa tinuod nilang tuyo sa pag-abuso sa gahom ug pagsurikbot sa nasudnong panudlanan, makabawos ang mga Duterte pinaagi sa pagkabayo sa lehitimong mga protesta sa nagkalainlaing sektor–apil nang mga magtutudlo, mga mamumuo, mga negosyante ug retiradong mga opisyal sa militar ug kapolisan–batok sa labing kurakot ug labing nangalisbo nga budget sa kasaysayan.
* * *
- Latest
