Nagbilar sa haya, patay
CEBU, Philippines — Patay ang usa ka 48-anyos nga lalaki human nabanggaan og motorsiklo sa National Highway, Sitio Grayrocks, Barangay Pangdan, dakbayan sa Naga, Cebu, sayong kabuntagon sa Huwebes, Nobyembre 12, 2026.
Giila ang biktima nga si Joselito Laput Magcanta, residente sa maong lugar.
Base sa inisyal nga imbestigasyon sa kapulisan, nagbarog sa karsada ang biktima kay nagbilar sa haya sa ilang silingan.
Kalit kining nabanggaan sa usa ka itom nga motorsiklo nga gimaneho ni Rodrigo Pacas Dumalagan Jr., 48-anyos.
Gikan sa Barangay Uling ug paingon sa Barangay Tinaan ang motorsiklo dihang nahitabo ang aksidente pasado ala-una sa kaadlawon. Matud sa anak sa biktima nga si Christian Nino Canillo, nagduda silang hubog ang iyang amahan sa wala pa nahitabo ang insidente.
Tungod sa kusog sa pagkabangga, natumba sa karsada ang biktima ug ang drayber sa motorsiklo ug nakaangkon og mga samad sa lawas.
Gidala dayon silang duha sa City of Naga Infirmary aron matambalan apan gideklarar nga dead on arrival ang biktima sa doktor.
Samtang, na-admit usab ang drayber sa motorsiklo nga kasamtangan anaa pa sa tambalanan. (BANAT NEWS)
- Latest
