Trak nga kargado’g butane, nalimbuwad

CEBU, Philippines — Nalimbuwad ang usa ka Fuso Fighter steel cage truck nga kargado og gibana-banang 660 ka crates sa butane canisters human gikatahong nikagar ang preno niini sa National Highway, Baud, Barangay Media Once, Toledo City, Cebu, alas-10:50 sa buntag niadtong Huwebes, Oktubre 29, 2026.

Ang truck nga gimaneho sa 47-anyos nga lalaki nga residente sa Naga City, Cebu. Gikan kini sa Naga City padulong sa Pinamungajan sa dihang nahitabo ang insidente.

Base sa inisyal nga imbestigasyon sa Toledo City Police Station, pag-abot sa kurbada ug paubos nga bahin sa dalan, gikatahong napalya ang preno sa truck hinungdan nga nawad-an og kontrol ang drayber ug nalimbuwad ang sakyanan.

Mibangga kini sa usa ka naka-park nga multicab pickup sa wala pa maigo ang duol nga tindahan.  Luwas ra hinuon ang drayber ug iyang pahinante sa maong aksidente.

Gipahinumdoman sa Toledo City Police Station ang mga motorista nga siguruhong maayo ang kondisyon sa ilang mga sakyanan, ilabina ang sistema sa preno, ug mag-amping sa pag-agi sa mga kurbada ug paubos nga mga dalan.—  IBM BANAT NEWS