106 lugar, nasa state of calamity dahil sa El Niño - NDRRMC

MANILA, Philippines — Isinailalim sa state of calamity ang 106 lungsod at munisipalidad sa buong bansa dahil sa inaasahang El Niño na kung saan ay maaapektuhan din ang nasa 388,375 indibidwal, ayon sa National Disaster Risk Reduction and Management Council (NDRRMC).

Sa pinakahuling ulat nito nitong Lunes, sinabi ng NDRRMC na 66 na lugar sa Cagayan ang nasa ilalim ng estado ng kalamidad, kasama ang 23 sa rehiyon ng Caraga, 12 sa rehiyon ng Bicol, apat sa Calabarzon, at isa sa Soccsksargen.

Naitala ng Cagayan ang pinakamataas na bilang ng mga apektadong indibidwal na 47,587, sinundan ng Caraga na may 45,507, at Bicol na may 11,055, habang 191 indibidwal naman ang naiulat na magiging apektado sa Calabarzon.

Nasa 39 namang kagubatan, kahuyan at mga kabundukan ang dumanas ng sunog sa CARAGA Administrative Region. Habang apat namang lungsod at munisipalidad ang nakararanas ng problema sa suplay ng tubig .

Sinabi ng NDRRMC na nagbigay ang pamahalaan ng P39,058,681.06 na tulong sa 24,618 sa 35,893 pamilyang natukoy na nangangailangan ng ayuda.

Nauna nang sinabi ng Philippine Atmospheric, Geophysical and Astronomical Services Administration (Pagasa) na maaaring lumakas ang El Ni? at maging isang “very strong” na penomeno sa pagitan ng Setyembre at Disyembre, at magpatuloy hanggang sa unang kalahati ng 2027.