Amahan namusil, gipadakop sa anak

CEBU, Philippines —  Gidakop sa kapolisan ang 60-anyos nga lalaki human giingong mipusil sa iyang 30-anyos nga anak atol sa ilang panaglalis sa Purok 7, Barangay Daanlungsod, Toledo City, Cebu niadtong Huwebes sa hapon, Septiyembre 10.

Giila sa Toledo City Police Station ang suspetsado sa alyas nga “Sunny,” 60, minyo ug residente sa maong lugar, samtang ang biktima giila sa alyas nga “Mark,” 30, nga iyang anak.

Matod sa kapolisan, misumbong mismo si Mark sa police station pasado alas-4 sa hapon ug misulti nga naglalis sila sa iyang amahan hangtod misangpot kini ngadto panaglayod nilang duha.

Giingong mibunot og pusil ang iyang amahan ug mipabuto ngadto sa iyang anak atol sa panaglalis.

Wala maigo si Mark sa unang buto human nakapangitag tagoanan luyo sa konkretong pader ug nakadagan palayo ug midiretso sa police station aron mangayo og tabang.

Sa pagtubag sa mga pulis sa alarma nga gipangulohan ni Police Senior Master Sergeant Mark Anthony Salvacion pasado alas-4:30 sa hapon ilang naabtan ang suspek sa gawas sa balay.

Narekober sa mga pulis ang usa ka basiyo nga bala sa .45 caliber gikan sa yuta. Pinaagi sa negosasyon, nakumbinsir sa mga pulis ang suspek nga mosurender nga malinawon.

Gitugyan usab sa suspetsado ang usa ka .45-caliber nga pistola nga adunay usa ka bala sa chamber, usa ka walay sulod nga magazine ug itom nga inside-the-waistband holster.

Sa dihang gipangayoan sa mga pulis og License to Own and Possess Firearms o LTOPF, wala siya makapakita og balidong dokumento alang sa maong armas.

Tungod niini, gidakop ang suspek ug gibalhog sa karsel sa Toledo City Police Station alang sa pagpasaka og kaso.

Si Toledo City Police Chief Police Lieutenant Colonel Verniño B. Noserale, nag-andam sa kasong attempted parricide ubos sa Revised Penal Code ug illegal possession of firearms and ammunition ubos sa Republic Act No. 10591 batok sa suspetsado nga ipasaka sa Prosecutor’s Office.(BANAT NEWS)