Nagbitbit og armas nasikop

CEBU, Philippines — Nadakpan sa kapolisan ang usa ka 45-anyos nga lalaki human masakpan sa mga pulis nga nagkupot og dili lisensiyadong .45-caliber pistol diha sa Barangay Mabasa, Argao, Cebu, alas-11 sa gabii niadtong Agosto 27, 2026.

Narekober usab gikan kaniya ang usa ka magazine ug unom ka bala sa .45-caliber ammunition. Pag-abot sa mga polis sa maong lugar, namataan nila ang lalaki nga nagsul-ob og orange nga sleeveless shirt ug puti nga shorts samtang nagkupot og armas sa iyang tuo nga kamot. Giduol sa mga pulis ang lalaki ug nagpaila sa ilang kaugalingon ug gimandoan siya nga ipaubos ang armas.

Wala siyay napakitang valid license, permit o uban pang dokumento nga nagtugot kaniya sa pagpanag-iya ug pagdala sa armas hinungdan nga gidakop kini dayun.

Ang pagresponde sa mga pulis nagumikan tungod sa nadawat sa Argao Municipal Police Station nga tawag sa telepono alas-10 sa gabii bahin sa usa ka gi-report nga domestic violence incident sa maong lugar. Ang lalaki pasakaan og kasong paglapas sa Republic Act No. 10591 o Comprehensive Firearms and Ammunition Regulation Act.— IBM BANAT NEWS