Beermen mikastigo sa Giant Risers

CEBU, Philippines — Ang San Miguel Beermen nagmangtas sa second half aron ilampornas sa Titan Ultra Giant Risers, 143-105, alang sa ikaupat nilang daog sa PBA Season 50 Governors Cup niadtong Miyerkules sa gabii, Hulyo 29, didto sa Ninoy Aquino Stadium.

Si George King mipaulbo og 35 puntos samtang si Jerrick Ahanmisi mikadlit og 26 puntos alang sa Beermen, nga padayong nagsolo sa ikaduhang puwesto sa Group A uban ang 4-1 rekord.

Dako sab og naambag si Don Trollano uban ang 22 puntos alang sa Beermen, nga nakabentaha lamang og tres puntos, 61-58, sa halftime.

Apan ang Beermen mipabuto og 49 puntos sa ikatulong kuwarter samtang gilimitahan ang Titan sa 23 puntos aron paburoton ang ilang labaw ngadto sa 29 puntos, 110-81, padung sa pinal nga 12 minutos.

Padayong nanginit ang Beermen aron lat-an og Giant Risers og 38 puntos human sa duwa.

Si Marcio Lassiter maoy laing double-digit scorer sa Beermen bitbit ang 13 puntos. Si Joshua Munzon miposte og 25 puntos, samtang sila si Sherwin Sajonia ug Josh Brown nagkumboya'g 34 puntos alang sa Titan, nga nakatilaw sa ikalima nilang pildi nga giatbangan og usa pa ka daog.

Sa laing bahin, si De’Vondre Perry mitali og 34 puntos ug 14 ka rebounds samtang si Damien Chongqui mibirada og 29 puntos sa dihang gipakaging sa Macau Giant Pandas ang Terrafirma Dyip, 96-92, alang sa ikaduha nilang sagunson nga daog.