Mapangahason nga bahad

Mibahad si Senador Erwin Tulfo nga ipa-aresto niya kadtong mga senador nga mopahigayon og pagdungog isip Senate Blue Ribbon Committee.  Matud ni Tulfo, siya ang lehitimong chairman sa maong komitiba. Dugang pa ni Tulfo, kwelyohan/liaban niya ang senador pa-gawas sa senado kadtong senador nga dili motuman.  Mapanghason ang maong bahad. Apan daw salawayon kini tungod kay gawas nga puno sa kahambog ug kakulangsa respeto, daw dili siya senador ug statesman sa matang sa iyang sinultihan. Mao kana’y giingon nga, “Mahimo ra’ng magminaldito o ba kaha magpabalaan-balaan ang tawo, apan kataw-anan ra gihapon siya niadtong nasayod na sa tinuod niya’ng pagkatawo.”  Alams na!

Limod hangtud ‘matay

Dali’ng gipanghimakak sa hingtungdan’g mga senador ug congressman ang pamahayag sa pundok sa mga “ex-Marines” nga naghatud sila’g mga maleta nga puno sa kwarta ngadto sa mga senador ug congressman.  Usa lamang kuno kini ka distraction sa ipahigayon nga impeachment trial sa bise presidente.  Sayod ang katawhan nga ang paglimod dili makapausab sa kamatuoran. Ni’ng ilang pagpangulipas, daw gihangop nila ang hiwi nga tambag nga nag-ingon, “Ang labing sayon nga paagi pagsulbad sa pasangil sa pagpangawkaw, mao ang paglimod nga aduna sila’y gihimo’ng pagpangawkaw. Busa, limod hangtud ‘matay.”  Fezteleern!

Naluwas sa burukrasya

Miluwat og show-cause orders ang Department of Energy (DOE) ngadto sa ubang mga fuel retailers sa Visayas, human nabatyagan sa mga monitoring teams nga nagbaligya sila’g mga produkto’ng petrolyo sa presyo nga labaw sa gitakda nga price range sa DOE.  Kon unsa man ugaling ang tinuod nga katuyoan sa DOE, daw malisod kining kab-oton tungod kay mismo ang presyo sa lana mag-usab-usab man, butang nga wala gayod nila sulbara ug mapangandami. Haum ang panahom nga, “Ang bugtong hinungdan nga naluwas kita sa burukrasya sa gobyerno, mao ang pagkabulay-og sa mga nagdumala niini.” Madahaan!

Lisod na tabunan

Namahayag si NBI Director Melvin Matibag nga aduna pa’y dugang nga mga arrest warrant nga pagaluwatan sa International Criminal Court (ICC) ni’ng bulana kabahin sa drug war campaign sa miaging administrasyon.  Dugang pa ni Matibag, walay kalabotan niini ang administrasyon  Mora’g nanimahong botbot man kining pamahayag ni Matibag nga walay labot ang administrasyon sa pagluwat unya sa ICC og dugang arrest warrant. Angayan hinumduman ni Matibag ang panultihon nga, “Ang pagpamakak, nahisama sa na-opaw nga bahin sa ulo nga kon magkadako na, mas lisod na usab kini’ng tabunan.”  Muleeng!

 Pagtulon-an sa jellyfish

Gikataho nga ang mga jellyfish nga unang napalgan diha sa Barangay Marigondon, Lapu-lapu City mikaylap na paingon sa Barangay Sta. Rosa. Tungod niini, gipahimangnooan sa Cenro sa Lapu-lapu City ang publiko nga likayan nga matandang sa jellyfish kay makadaut kini sa panit. Apan bisan pa man sa maong kakuyaw, aduna gihapo’y pagtulon-an nga makuha gikan sa jellyfish. Una, dili sila maantigo motago og bakak kay sihag (transparent) man kaayo sila.  Ikaduha, bisan wala silay utok, nabuhi gihapon sila sulod sa hataas kaayo nga panahon, butang nga nakahatag og paglaum ngadto sa kadaghanan kanato.  Pagkatoytoy!