Mga ihalas nga mananap gi-rescue

CEBU, Philippines — Gi-rescue sa mga otoridad ang mga gikonsiderar nga mga protected wildlife species nga gibanabana nga nagkantidad tanan og P3.5 milyones atol sa joint wildlife enforcement operation nga gipahigayon sa CIDG, DENR Region 7, ug Medellin Municipal Police Station niadtong Miyerkules sa buntag Hunyo 3.

Ang operasyon nga gitawag og Oplan Kalikasan gihimo diha sa usa ka resort sa Sitio Tambo, Barangay Kawit, Medellin, Cebu human sa nadawat nga impormasyon kabahin sa giingong ilegal nga pagpanag-iya, pag-atiman og mga protected wildlife sulod sa resort.

Gidakop sa kapolisan ang usa ka alyas "Lyn"  55 anyos, manager sa resort ug residente sa Zamboanga City tungod sa paglapas sa Section 27(f) sa Republic Act No. 9147 o ang Wildlife Resources Conservation and Protection Act of 2001.

Matud sa CIDG RFU7, ilang nasuta nga daghang langgam ug mga bao nga gigamit isip atraksyon sa mga bisita sa resort nga walay  permit ug dokumento gikan sa DENR. Human sa beripikasyon, napamatud-an nga pipila niini mga protected wildlife species nga dili mahimong panag-iyahon o ipakita sa publiko kung walay tukmang otorisasyon.

Lakip sa mga nasalbar mao ang mga Blue-Naped Parrot, Black Palm Cockatoo, nga pulos endangered species, Brahminy Kite, lain-laing klase sa Macao, African Grey Parrot, Eclectus Parrots, ug African Spurred Tortoises.

Ang mga nasalbar nga mga mananap gi-turnover ngadto sa DENR Region 7 alang sa tukmang pag-atiman ug rehabilitasyon.

Samtang gidala ang dinakpan sa CIDG Mandaue City Field Unit alang sa dugang imbestigasyon ug pagproseso sa kaso.  (BANAT NEWS)