1,255 gidakop ubos sa Safer Cities Initiative   

CEBU, Philippines — Niabot sa 1,255  ka mga indibidwal ang nadakpan sa  Cebu  Police Provincial  Office (CPPO) sa tibuok lalawigan sa Sugbo tungod sa nagkadiyang kalapasan sa mga lokal nga ordinansa, sa gipahigayon nga Safer Cities Initiatives, niadtong Hunyo 1 ug 2, 2026.

Ang maong operasyon gihimo ubos sa gipatuman nga Safer Cities Initiatives aron mas mapalig-on ang disiplina, public order, ug community safety pinaagi sa estriktong pagpatuman sa mga lokal nga ordinansa ug sa padayong presensya sa kapolisan.

Base sa report, ang CPPO nagpahigayon og 433 ka anti-criminality operations nga miresulta sa pagkasikop sa mga indibidwal nga nakalapas  sa mga lokal nga ordinansa, sama sa paglapas sa trapiko sa siyudad ug munisipyo, pag-inom ug pagpanigarilyo sa mga publikong lugar, mga nagsuroy-suroy nga walay sinina, paglapas sa curfew,  ug ilegal nga paggamit og videoke lapas sa gitugot  nga oras. Subay sa maong  report, 876 ang nadakpan tungod sa paglapas sa traffic ordinance, 130 ang nag-inom sa publikong lugar, 131 ang mga nilapas sa curfew, 66 ang nagsuroy-suroy nga walay sinina sa publikong lugar, 16 ang ilegal nga naggamit og videoke, ug 29 ang nadakpan nga nanigarilyo sa gidiling dapit.

Suma pa ni Cebu PPO Provincial Director Police Colonel Abubakar Undang Mangelen Jr.,  ang maong kampanya dili lamang para sa pagpanakop kundili alang usab sa pag disiplina ug pagpugong sa mga krimen.

Sa laing bahin, gidayeg ni Police Brigadier General Arnold Evangelista Abad, regional director sa Police Regional Office-Central Visayas (PRO-7), ang mga police unit sa ilang padayong pagpatuman sa mga preventive law enforcement measures.— Cheny Labrador (BANAT NEWS)