Wemby mogukod sa iyang damgo sa NBA Finals
CEBU, Philippines — Si Victor Wembanyama nagtinguha nga mosemento sa iyang estado isip bag-ong nawong sa basketball sa dihang pangulohan niya ang San Antonio Spurs sa Game 1 sa NBA Finals batok sa New Yorks Knicks nga naglaraw bisbisan ang 53 ka tuig nilang huwaw sa titulo.
Ang giatngan nga best-of-seven series tali sa Spurs ug Knicks mosikad karong Huybes, Hunyo 4 (oras dinhi sa Pilipinas) didto sa Frost Bank Center sa San Antonio, Texas.
Tulo ka tuig pa lamang sukad siya mitugpa sa NBA isip top pick sa 2023 draft, ang French superstar mibandera sa Spurs ngadto sa makapakurat nga kausaban sud sa mubo nga panahon.
Karon, ang 7-foot-4 nga sentro namalandong sa labing unang NBA Finals sa iyang karera ingon man naglantaw ngadto sa paghatag og katumanan sa iyang damgo gikan pa sa iyang pagkabata.
"Winning the Larry O'Brien (NBA championship trophy) is a childhood dream, and having a real shot at it, having a tangible chance at winning it -- it's a lifetime chance," padayag pa ni Wembanyama. "It's hard to put into words. It's almost like the meaning of my life."
Nagbarog sa dalan ni Wembanyama ug sa Spurs mao ang Knicks, nga naglaraw mobira sa una nilang korona sukad niadtong 1973.
- Latest
