Kaon ang tirade

Dear Tito Miguel,

Ako diay si Alkie Jan, taga Liloan, Cebu .

Naa koy uyab nga akong gihigugma pag-ayo ug siya si Myka . Buotan ug supportive kaayo sa akoa. Apan naa koy usa ka problema nga akong nabantayan niya. Hilig kaayo siya mokaon, ug usahay mura na gyud og sobra. Bisan human na siya'g kaon , mangita gihapon siya og snacks o laing pagkaon. Usahay, halos tibuok adlaw siya sige'g kaon.

Naglisod ko unsaon paghisgot ani niya kay basin masakitan siya sa akong isulti. Nahadlok ko nga basin maapektuhan ang iyang panglawas sa kadugayan. Gusto ra unta ko motabang ug moatiman niya, pero dili ko kahibalo unsaon pag-istorya nga dili siya ma-offend. Nakaingon ko, gluttony naman ni iyang sala uy .  Bahala’g busog na kaayo, mangita gihapon og laing pagkaon.  Tito Miguel , unsaon nako siya pagsulti  nga dili siya tanto nga malain?

Ug unsa pud ang maayong paagi aron matabangan nako siya nga mahimong mas himsog ang iyang lifestyle? Daghang salamat sa imong lindog  nga naghatag  og giya ug tambag sa mga sama nako nga dunay gihambin nga suliran. — Alkie Jan

* * *

Alkie Jan,

Wala ka maghisgot kun nanambok na siya. Kasagaran sa mga babaye, dili gusto manambok, gusto nila mora sila’g tukog. Mao na’y labing epektibo nga mopakgang sa iyang gana sa kaon. Kun wa pa manambok, ingna hinay hinaya’g iban iyang kaon kay basin kalit siya moburot. Aron dili masakitan, ingna dungan mo’g diet. Limitahan inyong kinan-an mata’g adlaw aron magpabilin inyong kahimsog, malikayan ang mga sakit, labi na ini’g katiguwang. Kana bitaw diabetes resulta man na sa sige’g kao’g tam-is sa bata pa, nitumaw na lang ini’g edaran na. Busa agniha siya nga kamong duha magmatngon sa inyong gikaon ug kun unsa kadaghana. Gani, mahimo mo mosuway magpuasa, 16 ka oras ba kaha o dili na mokaon sa gabii, aron makapahuway ang tiyan sige’g galing ug hilis sa pagkaon.

Sa primero maglisod gyud siya, ka’y naanad siya nga sa kaon walay makapugong. Ingna lang hinay hinayon ninyo, dili pakalitan kay basin hasta inyong lawas dili makasagang. Mahimo man ibanan ang snacks, upat man daw ka oras gutomon huma’g kaon. Kun dili malikayan, mahimo pulihan ang naandan nga pagkaon. Inay nga fast o junk food, prutas ang kan-on. Agniha siya nga mag -research mong duha unsay angay buhaton nga madisiplina mo sa kaon. Naa ra man na tanan halos sa internet. Aron dili siya malain nga nakabantay ka nga dako siya’g kaon, ipakita nga imong kaugalingong desisyon ang mag-diet, apan gusto lang ka kauban siya sa wellness journey ninyong duha.  Tito Miguel

Magpatambag ka? Ipada kang Tito Miguel: 0991-318-9366