Nagluib ang bana

Dear Tito Miguel,

Ako diay si   Ciaries , 34 anyos, minyo na sulod sa tulo ka tuig ug adunay duha ka anak. Nagdesisyon ko nga mosulat kanimo  kay bug-at na kaayo ang akong gibati ug wala na ko kahibalo unsaon pag-atubang sa akong problema. Bag-o lang nako nadiskubrehan nga ang akong bana nga si Niño  kay adunay laing babaye. Nakita nako ang ilang mga mensahe sa cellphone nga klaro kaayong nagpakita nga dili lang kini basta-basta nga panaghigala. Sa dihang ako siya nga gi-confront , niangkon siya nga nakasala siya apan nihangyo  nga pasayloon nako siya .

Wala ko kahibalo kun unsa ako itubag niya kay nasakitan gyud ko og maayo . Murag nabungkag ang akong pagsalig ug respeto  ngadto kaniya . Kada adlaw, maglisod ko ug tulog kay magsige ko’g huna-huna.

Hangtod karon, naglibog ko kung unsa ang angay nga buhaton. Pasayloon ba nako siya ug sulayan pag-usab ang among relasyon bisan sakit pa kaayo? O mas maayo bang pili-on ang akong kaugalingong dignidad bisan pa og magbuwag mi? — Ciaries

* * *

Ciaries,

Ayaw pasayloa kun igo ra nangayo’g pasaylo apan wala moundang sa iyang pagbudhi. Kinahanglan imong sigurohon nga buwag na sila sa iyang kabit. Kay kun nagpadayon maski kanimo ni-angkon na, wala’y pulos iyang pagpangayo’g pasaylo kun wala’y kausaban nga gihimo. Lagmit nagpadayon sila ug igo ra nitago.

Pero kun mopasalig nga wala na sila ug kumbinsido ka sa ebidensiya, mahimo nimo nga pasayloon. Apan ang imong problema ka’y nawala na imong respeto ug pagsalig niya. Kun gihigugma pa nimo siya, pasayloa, hatagi’g ikaduha nga higayon, labi na ka’y kamo kasado ug duna’y mga anak. Ang kaminyoon o maski unsa nga matang sa relasyon, wala’y garantiya, mahimo siya magbinuang karon, pero hingpit na nga mag-usab ug magtinarong. Puwede sab wala siya makasala sukad apan kalit lang mosimang. Dili nimo matag-an.

Pasayloa, kay kun mobuwag ka dayon, basin magbasol ka sa umaabot nga unsa kaha kun imo lang gihataga’g laing higayon, basin kaha kamo nagmalipayon. Kun makapasaylo ka, iyang sala ayaw na balik balika. Apan ayaw’g kumpyansa, paniid lang. Kun duna kay  makita nga kadudahan, ayaw dayo’g hasmag. Paabot nga makakita ka’g ebidensiya nga dili ikalimod. Diha na ka mohukom kun mobuhi na ka sa inyong relasyon. Giusban na gud, dili na kana sayop. Gipili na niya nga pasakitan ka. Pero samtang wala pa mahitabo ang imong gikahadlokan, tagamtama usa unsa’y naa ninyo, maski duna na’y lamat imong pagsalig niya. Kana kun nahigugma pa ka. Ka’y buot pasabot nasakitan lang ka, apan nagpadayon pagpangga niya.    —Tito Miguel

Magpatambag ka? Ipada kang Tito Miguel: 0991-318-9366