Present gf gisaway sa ex-gf

Dear Tito Miguel,

Maayong adlaw , ako diay si Jay , taga Barangay Sapangdako , Cebu City . Maglagot ko sa akong kanhi uyab nga si Ferra kay sigeg panaway sa akong  kasamtangang girlfriend nga si Steffi .  Sige siya og panabi sa among common friends  nga dili daw hitsuraan si Steffi . Sa tinud-anay , dili gyud unta ko angay nga mahasol kay guwapa intawn si Steffi  uy. Nasuya lang si Ferra kay nalabwan ang iyang kaguwapa . Naglagot lang ko hangtod karon kay magsige gihapon siya og buhi og mga negatibong pulong sa akong present girlfriend . Siyam ka buwan nami nga buwag ni Ferra, pero nagsamok-samok gihapon, duda nako wala pa siya ka move on. Klarohon nako, nagbuwag mi kaniadto kay duna siya'y lain nga kairing-iring. Unsa akong buhaton aron mohilom na siya ? Ako , man gud ang nalouy sa akong present GF.  —JAY

* * *

Jay,

Ikaw ang angay mohilom, dili siya. Ka’y kun imo na tagdon ug patolan samot na mogara. Malipay pa, ka’y nakuha niya iyang gusto, ang imong panahon ug atensyon. Klaro man nga nagmahay siya sa iyang gibuhat, ganahan mobalik nimo apan duna na’y babag, ang karon nga imong uyab. Mao na iyang gipuntirya, gisaway sa hitsura. Pasagdi siya. Hasta ang inyong mga higala nga iyang istoryahan, nakahibawo unsa’y tinuod, nga bitter lang siya ug kun kinsa’y mas guwapa. Gani, dili na importante ang panan-aw sa uban, kun para nila mas guapa imong ex apan para kanimo mas guapa imong gipuli niya, mao ra na’y importante, wala na’y bili ang ilang isulti. Wala man sila’y labot sa inyong relasyon. Ka’y maski unsa pa kaguapa imong uyab, pangitaan gihapon na’g apan o kakuwangan. Busa kun magsige ka’g paminaw sa isulti sa uban, mora ra ka’g buang.

Dili angay kaluy-an imong uyab, ka’y siya ang naa sa imong kiliran karon. Ang imong ex ang luoy ka’y siya naglungot-lungot pa. Wala man gani ka maghisgot nga natandog imong uyab karon. Pero’g pananglit apektado siya, ipakita ug ipabati niya nga siya ang pinakaguwapa. Ipamatuod nga nalimot na ka sa imo’ng ex, maski unsa pa’y iyang buhaton o isulti wala na’y kuwenta. Maski mo-tumbling pa siya, matud pa. Sundoga ang leon, pasagdan ang iro nga sige’g paghot. Dili man gani lingi-on, samot na nga dili tubagon. —Tito Miguel

Magpatambag ka? Ipada kang Tito Miguel: 0991-318-9366