Hadlok biyaan sa uyab

Dear Tito Miguel,

Maayong adlaw kaninyo. Tawga lang ko sa ngalan nga Jay, taga  Argao, Cebu. Mangayo unta ko og tambag kay bug-at na kaayo ang akong gibati. Naa koy uyab nga akong gihigugma pag-ayo nga ginganlan og  Ayessa. Sa pagkaron, ako ang nagasuporta sa iyang pag-eskwela sa kolehiyo, sa karon nga year level.  Sunod tuig na siya mo-graduate sa kurso nga nursing.  Naa ko’y igong negosyo nga  maayo ang dagan, maong  maka-afford ra gyud ko sa papa-eskwela sa akong uyab.  Duha ka tuig na diay mi nga nag-live in.

Nagplano unta siya sauna nga dili motiwas sa pag-eskwela tungod sa financial problem. Akong gipugngan ang iyang plano ug ni-offer nga akoy mopatiwas niya sa pagpa-eskwela. Apan matag gabii, dili gyud ko katulog tungod sa akong sigeg huna-huna. Pirme nako mahunahuna nga kung makahuman na siya og eskwela, basin biyaan ra ko niya. Nag-overthink ko, tungod sa mga magdungan nako nga  istorya  nga dunay  mag-uyab  nga susama namo og sitwasyon, kalit gibiyaan human nahuman og eskwela ang iyang partner. Unsa akong buhaton aron dili ko maghuna-huna og negatibo ? - JAY-

* * *

Jay,

Hunahunaa nga ang sunod mahitabo wala sa imong mga kamot. Dili nimo kontrolado ang ugma. Apan mahimo pangandaman. Ayaw na’g hunahuna’g dautan, ka’y mao kini mohikaw sa imong kalipay. Inay nga mag sige ka’g kaguol sa umaabot, tagamtama ang unsa’y naa ninyo karon.

Ayaw tugoti nga ang wala pa nahitabo mokontrolar na sa imong kinabuhi ug relasyon karon. Ang tanan sugal, wala’y garantiya ug kasigurohan. Karon kun mahitabo imong gikahadlokan, pasalamat nga nailhan nimo unsa siya, nga gigamit ra ka niya. Ang imong gasto ayaw na kuwentaha, ka’y wala man ka niya pugsa. Hunahunaa na lang naa kay natabangan, maski dili angayan. Apan pagkat-on, ayaw sagoli’g kuwarta ang relasyon kun dili pa mo kasado. Ka’y ang tinuod dili pa nimo siya obligasyon. -Tito Miguel-

Magpatambag ka? Ipada kang Tito Miguel: 0991-318-9366