Nataypan sa maestro

Dear Tito Miguel ,

Maayong adlaw kanimo ug sa imong suking readers . Nagsulat ko aron mangayo og tambag bahin sa usa ka sitwasyon nga naglibog gyud ko. Ako diay si Darlene , taga Minglanilla , Cebu ug usa ka  college  student.  Naproblema ko kay magsige og chat ang akong maestro .

Dili ko assuming ha, apan naka-feel gyud ko nga dunay something sa pagsige niya og chat nako. Isip student , maikog man gud ko nga dili mo-reply niya . Kanunay siya mangumusta , ug laktod pagka- istorya , nagpa-cute gyud siya nako .Sa ako na nga giingon, mapugos ko og reply niya kay maikog ko .

Dili pako andam  nga mag-uyab uyab, busa ganahan ko nga ako siya prangkahan , apan unsaon  man nako  pag-ingon nga dili siya tanto nga malain ?  — DARLANE

* * *

Darlene,

Malain gyud na maski unsaon nimo’g balibad ka’y dili na magdahom makaako ka. Nagsalig siya kay maestro nimo siya. Mao na’y gitawag nga moral ascendancy, tungod niini mapugos ka’g tubag kay maikog ka. Vitiated consent ang tawag ana sa balaod.  Kun kaya nimo moatubang niya sa personal, ingna dili ka komportable sa iyang mga mensahe, hadlok ka mabasahan sa imong ginikanan, basin lainon nila’g sabot iyang mga mensahe. O kun duna ka’y uyab, samot nga duna kay rason sa imong gikahadlokan. Sa maong paagi dili siya tanto malain, ka’y kunohay para nimo walay malisya apan basin laino’g sabot sa imong ginikanan o uyab. Pero pag-andam kay posible diha na siya mo level-up sa iyang lakang, ka’y para niya nikagat ka sa iyang pa-cute. Basin mo-ingon magbuhat ka’g lain nga account para ra niya o dili ba kaha magkita mong duha. Kun mahitabo na, ingna dili ka makaako magtago sa imong ginikanan o uyab.

Kun dili nimo kaya mo-istorya niya, ayaw na tubaga, ayaw na tan-awa iyang mga mensahe hangtod siya ang maluya. Bahala na’g malain siya. Gani, ikaw ang mahimong biktima niini. Siya ang angay maikog nimo sa iyang gibuhat. Padulong kini sa sexual harassment. Konsulta’g abugado aron sigurado. Basin naguol ka unsay mahitabo sa imo’ng grado. Paningkamot nga sa tanang exam ikaw pasado. Kun pananglit hagbongon ka apan duna ka’y ebidensiya nga pasado ka, mahimo ka moreklamo sa labaw niya, ipakita iyang mga mensahe nga maoy makapasabot ngano kalit ka naibot.   —Tito Miguel-

Magpatambag ka? Ipada kang Tito Miguel: 0991-318-9366