Hilaw nga relasyon

Dear Tito Miguel,

Maayong adlaw, ako diay si Nazareth, taga Barangay Camputhaw, Cebu City. Akong problema karon kay ang akong boyfriend  nga si  Johnny. Hangtod karon , dili gihapon nako ma-feel nga love ko niya. Seguro, mao nani ang resulta sa pagsige nako og gukod niya . Dugay naman unta ko niya buwagan ,pero dili man ko mosugot . Upat ka tuig na diay ang among relasyon , pero murag ra jud siya og wala . Na-feel nako nga napugos ra siya og stay sa among relasyon kay maikog siya.  Unsa akong buhaton para sayon na nako madawat ang pag-let go niya?  — Nazareth

* * *

Nazareth,

Tan-aw ko dili pa ang  pag move on ang imong buhaton. Apan unsaon pagdiskubre sa kamatuoran. Upat ka tuig na mo nga uyab, apan wala nimo mabati nga gimahal ka niya. Ang pangutana, ngano nagpabilin man siya? Tungod lang kay sige ka’g gukod? Kun napugos ra siya sa inyong relasyon, ngano moabot man siya’g upat ka tuig? Dili kaha ka’y dili lang siya kahibawo mopadayag sa iyang pagmahal nimo pinaagi sa pulong ug buhat? Duna’y mga lalaki nga nagmahal kanimo, apan dili romantiko. Posible ing ana siya. Mao na nga dili ka maka-feel sa iyang presensiya ug gugma. Sa laktod, uga siya, dry ug boring, kun sa inenglis pa. Kay kun napugos lang siya’g naikog kanimo, taas ra sad kaayo ang upat ka tuig. Wala siya’y mga tiil nga makadagan palayo nimo? Aron ka makasiguro, pakigbuwag na. Dili kinahanglan imong istoryahon, kalit lang wagtanga imong kaugalingon.

Kun pangitaon ka, buot pasabot importante ka niya. Wala diay siya napugos. Ka’y kun napugos pa’g naikog, dili na siya mistil mangita, magsadya na siya sa iyang kagawasan. Diha na ka mo-istorya niya, klaroha asa ka dapit sa iyang kasingkasing.

Kun dili ka pangitaon, insakto imong duda, nga wala ka’y kuwenta niya. Sakit, apan dawata. Wala’y formula unsao’g move on sa napakyas nga relasyon. Panahon ra’y makatambal ug makapalimot nimo. Hunahunaa lang nga kinahanglan imong putlon ang relasyon nga wala’y kaugmaon. Mas  maayo masakitan ka karon, kaysa sunod nga panahon nga ang samad magkalawom.   — Tito Miguel

Magpatambag ka? Ipada kang Tito Miguel: 0991-318-9366