Dangpanan ang ex-boyfriend

Dear Tito Miguel,

Ako diay si Jay-R , taga Barangay Busay ,Cebu City . Naproblema ko sa akong uyab nga si Clarissa kay kun mag-away mi, ang tig-comfort niya kay ang iyang ex-boyfriend . Kapila na nako siya gibadlong ana,apan dili gihapon siya mopatoo nako.  Nahadlok  ko kay  sa pagsige og comfort sa iyang  ex, basin magkabalik na hinoun sila. Samotan na nga single baya ang iyang ex karon .  — Jay-R 

* * *  

Jay-R,

Ayaw badlonga kun asa ug kang kinsa siya modangop kun mag-away mo. Natural ra na. Lain sad kaayo’g sa imo siya modangop nga ikaw ikaw man o ang inyong problema ang hinungdan sa iyang kagul-anan. Apan dili unta sa ex. Pero ka’y didto man, hinangpa kini isip sukod sa iyang pagkatawo ug pagmahal kanimo.  Selfish siya. Kun kanimo siya problemado, modagan sa tawo nga kaniya moulo-ulo. Kun asa siya kapabor, tua siya. Mora’g bata nga kun kasab-an sa inahan, sa amahan magpalaban. Unya’g maulian, mobalik na sab sa inahan.

Wala siya’y respeto kanimo. Kun husto pa siya, dili na gyud unta siya makigkita sa iyang ex maski pa naglagot siya’g nangluod kanimo. Daghan  ang mahimong  kadangpan, mga higala ug pamilya. Ngano sa ex nga single pa gyud?

Hunahunaa, moduol siya sa iya’ng ex samtang masulob-on siya. Buot pasabot nangita siya’g molingaw kaniya. Gani, iyang giabli’g balik iyang pultahan sa iyang kagahapon. Wala niya gipamulong, apan ang iyang pagduol sa ex tabla ra’g ni-ingon siya nga maayo pa’g kita ra gihapon, karon nuon ako masulob-on. Klaro kaayo nga duna pa siya’y pagbati. Natural nga pahimuslan kini sa iya’ng ex. Nahadlok ka nga magkauli sila? Posible nahitabo na. Kun wala pa, ayaw na paabota. Nagbaga nga puwa nga bandila ang binuhatan sa imong uyab. Kahibawo siya mismo nga kun mohilak siya atubangan sa iyang ex, gakson gyudbug  iya’g hapohapon. Unsa’y sunod hikapon, gamita imong imahinasyon.  —Tito Miguel

Magpatambag ka? Ipada kang Tito Miguel: 0991-318-936