Mavs sasagupa sa Thunder sa West semis

DALLAS — Nagkadena si Luka Doncic ng 28 points at 13 assists para sa 114-101 pagsibak ng Mavericks sa Los Angeles Clippers sa Game Six papasok sa Western Conference semifinals.

Tinapos ng Dallas sa 4-2 ang kanilang serye ng Los Angeles at sasagupain sa semis ang top seed Oklahoma City Thunder.

Umiskor si Kyrie Irving ng 28 sa kanyang 30 points sa second half kung saan inilista ng Mavericks ang 106-82 kalamangan sa dulo ng fourth period.

Tumipa si Paul George ng 18 points at 11 rebounds para sa Clippers habang may 16 points at 13 assists si James Harden.

Kumamada ang Dallas ng 35 points sa kabuuan ng third quarter at nililimitahan ang Los Angeles patungo sa pagtatala nila ng 20-point lead sa fourth quarter.

Sa Orlando, humugot si Paolo Banchero ng 10 sa kanyang 27 points sa fourth quarter para akayin ang Magic sa 103-96 paggupo sa Cleveland Cavaliers sa Game Six at itabla sa 3-3 ang kanilang Eastern Conference first-round playoff series.

Nakatakda ang Game Seven sa Lunes sa Cleveland kung saan ang mananalo ang sasagupa sa Boston Celtics sa best-of-seven semifinals showdown.