Makigkita gihapon sa ex

Dear Tito Miguel,

Dugay na gyud ko nga nagplano nga mopadangat sa akong suliran. Apan karon rako nga dunay kaisog nga mopaambit niini. Ako diay  si Clarissa, taga Barangay Guadalupe, Cebu City.   Duha na ka tuig ang relasyon namo ni Oreo. Kapila na nako siya nasakpan nga nakigkita gihapon siya sa iyang ex-girlfriend. Kapila na nako siya gibuwagan apan dili gyud siya mosugot kay ako gyud daw ang iyang love,  dali ra sadko malouy  ug pasayloon ra pud nako siya.Apan nagbalik-balik raman ang iyang binuhatan uy.  Hatagi ko og tips Tito Miguel aron mas dali ra nako siya ma-let go. Salamat kaayo. — Clarissa

* * *

Clarissa,

Wala’y sayon nga pamaagi pagbiya sa hinigugma, labi na sa iyang kiliran naanad na ka. Busa dili kalikayan moagwanta ka sa kasakit ug kamingaw kun siya imong biyaan. Nalimot ka sa imong tuyo nga nanguyab ka niya, dili ba kay naglaom ka magdayon mong duha? Karon piyong, makita ba nimo imong kaugalingon nga ikasal kaniya, magtukod mo’g pamilya apan kanimo sige siya’g pamakak, panlingla ug pagbudhi? Ang cheater lisud usbon kay para niya wala’y dautan sa iyang binuhatan. Gani, siya pay masuko kun masakitan ka.

Unsaon man niya’g reporma kun wala siya’y nakitang hiwi sa iyang binuhatan? Para niya normal ra nga iyang uyab duha, dili siya makunsensiya. Samot na mamabaye kun kasado na mo, magsalig kay maglisod na ka’g biya. Ayaw pagdahom nga siya mausab kun magminyo mong duha. Dili kinahanglan paaboton ang kasal aron magtul-id. Ang tawo nga ligdong dili na mistil magkundisyon aron siya magtinarong. Magpadayon ba ka sa relasyon nga wala’y kaugmaon? Kun duna man, puno kini sa kasakit ug kaguol. Dili kini ang kaugmaon nga imo’ng giplano para sa imong kaugalingon.

Hatagi’g katapusang higayon, pero ayaw isulti aron dili magmatngon. Inig masakpan nimo, biya na dayon. Ayaw na hatagi’g higayon nga mangamuyo kanimo kay malanay na sad ka. Sigurado mohilak ka, matingala ngano kanimo wala siya matagbaw. Wala kay kuwang, siya ang sobra. Tagamtagama ang kasakit maka usa pa. Ayaw pugsa nga mawala dayon. Ang panahon ray makapalimot kanimo. Inig abot sa takna, mokatawa ka ngano kaniadto nagtinanga ka. —Tito Miguel

Magpatambag ka? Ipada kang Tito Miguel: 0991-318-9366