Anakan na ang bf

Dear Tito Miguel,

Ako diay si Yen , taga Mabolo, Cebu City. Akong problema ron kay ang akong pamilya nga dili makadawat sa akong boyfriend. Dili sila ganahan sa akong uyab kay naa nay duha ka anak. Nabalaka sila kay basin makaapil daw ko og buhi sa anak. Akong gipasabot akong pamilya, nga maayo man og panginabuhian ang akong uyab nga usa ka doctor.  Unsa akong buhaton Tito Miguel para mosugot sila sa among relasyon ? —YEN

 Yen,

Pasagdi ang panahon nga maoy mopasabot sa imong pamilya sa tinuod nga sitwasyon ninyo duha. Natural ra nga sila mabalaka, kay wa pa mo magdayon naghimugso na ka’g duha ka bata. Wala ka maghisgot sa iyang status kun single, buwag sa asawa o annulled? Kay kun duna pa siya’y sabit, basin mahimo ka nga kabit. Dihang dapita paminaw nila. Apan kun single father, mahimo nimo ipaglaban, apan ayaw ipamugos. Ang mga bata pila nay edad, kay kun gagmay pa, taas nga panahon pa nga sila gastohan. Pero’g hamtong na’g nanrabaho, wa na magsalig sa amahan. Ang angay nimo buhaton, ipa-ila ila siya’g maayo nila. Doktor man kaha sa medisina, lagmit taas ilang tan-aw, respetaran nila. Sultihi imong uyab ngano nagdumili sila. Ingna siya nay bahala unsao’g papas sa ilang pangagpas.

Lagmit abtik si dok, iyang imbitaron imong pamilya mangaon sa gawas, laag o bakasyon nga siya ang taya. O dili ba kaha iyang regalohan kun naay okasyon. Aron makita nila nga kuwartahan siya, nga posible pa ikaw ang makinabang kaysa siya nimo. Kun dili siya makahunahuna sa maong paagi, pasagdi. Paabota nga mangutana nimo. Kay kun siya seryoso kanimo, mangutana gyud na’g unsaon imong pamilya nga makauyon niya. Diha na ka puwede moagni niya unsao’g panguyab nila.Mahimo sad ipaagi sa iyang libre nga konsultasyon o pagtambal sa ilang sakit sa lawas. Duna man gyud panahon mosangpit sila’g doktor. Labi na’g maayo sa sakit, mahilis dayon ilang pagdumili, salamat dok ilang isukli.   —Tito Miguel

Magpatambag ka? Ipada kang Tito Miguel: 0998-581-5856