Pasagdi

Dear Tito Miguel,

Suki gyud ko sa imong column . Ako diay si Zisa. Unsaon mani nako akong uyab nga si Michael John  uy, bisan unsaon nako og badlong, mo-communicate gihapon siya sa iyang ex. Permi niya nga  palusot, friends ra gyud daw sila. Mao gyud na ang permi namo awayan. Maglisod man sad ko og give up sa among relasyon gud kay upat nami ka tuig.  —ZISA

 Zisa,

Ayaw badlonga, ayaw pugngi aron imong masusi asa ka dapit sa iyang kinabuhi. Usa ka dakong sayop sa relasyon ang sige’g pugong ug badlong sa pares. Dili na hinuon mahibaw-an unsa gyud diay gusto buhaton sa karelasyon, kansang kiliran siya gusto magpabilin, asa ug kang kinsa siya malingaw ug matagbaw. Gawas tingali kun ang hisgotanan paglapas sa balaod o pagbuhat sa dautan sama sa droga, sugal ug uban pang bisyo. Kana ang angay pugngan. Apan sa kun asa siya malipay, pasagdi aron makita nimo ikaw ba o lain ang iyang gusto. Puwede badlongon kausa, apan hatagi’g kagawasan hangtod asa siya.

Apan kay padayon gihapon iyang koneksyon sa iyang ex maski nagpadayag na ka sa imong gibati, buot pasabot wala siya’y respeto kanimo. Bahala’g masakitan ka basta sa iyang ex konektado siya. Maski isip higala ra, iya unta undangon kay lain tan-awon ug paminawon. Labaw sa tanan, supak sa imo’ng kabubut-on. Apan kay mo-insistir man siya, pangutan-a imong kaugalingon asa ka dihang dapita o kun duna ba moy kaugmaon. Kun sayang ang upat ka tuig, mas anugon kun mapun-an ang panahon nga ikaw wala magmalipayon, kay wala ka niya hatagi’g kalinaw sa hunahuna ug himaya sa kasingkasing. Ang kadugayon sa relasyon dili sukod sa gugma, usahay sukod kini sa pag-agwanta. —Tito Miguel

Magpatambag ka? Ipada kang Tito Miguel: 0998-581-5856