Sabalones ipalubong nalang

CEBU, Philippines – Ang patay nga lawas sa gituohang drug lord nga si Franz Sabalones, ipalubong na human naabtan na og 60 ka adlaw apan wala pa gihapoy kaliwat niini nga mi-claim sa iyang lawas didto sa Quezon City.

Ang gobiyerno sa Quezon maoy giingong moabaga sa gastos sa pagpalubong sa lawas sigon pa ni Quezon City Police District Deputy Chief Erson Digal sa mga tigbalita. Giingong wala makuha sa mga kabanay ni Sabalones ang lawas tungod kay matud pa gipaninglan sila sa punerarya og P1.8 milyon alang sa gasto pag-preserve sa lawas niini.

“Ipalubong na lang si Sabalones kay wala man ni siya na-claim gyud sa iyang paryente, naay niadto pero wala na nagpakita balik human gipaninglan,” sigon pa ni Digal.

Sigon pa ni Digal, adunay babaye na nagpaila nga iyaan ni Sabalones ang nipakita sa punerarya niadtong Hunyo 18 apan wala na maabti sa kapulisan aron unta ilang makuhaan og DNA-sample aron kompirmahon kun ang maong lawas mao ba gyud si Sabalones.

Mahinumduman nga wala nagtakdo ang fingerprint sa patay’ng lawas nga gituohang si Sabalones sa iyang record sa Comelec sa San Fernando.

Sigon pa kaniadto ni Police Regional Office-7 Debold Sinas posibleng wala nag-match kay dili siya ang nagtamla sa record niini sa Comelec o tungod na-decompose na iya lawas og sugod.

Namatay si Sabalones niadtong Abril 18 dihang padulong siya mosulod sa usa ka billiard bar sa Timog Avenue, Quezon City.

Kang kanhi PNP Chief Ronald “Bato” Dela Rosa mitahan si Sabalones niadtong 2016 apan wala gyud kini mapasakai og kaso. Ang kapolisan nakadawat og report nga bisan pa man sa pagtahan ni Sabalones, nipadayon gihapon kini sa pagpamaligya og illegal nga drugas. (/IBM)(BANAT NEWS)