Hugyaw nga Huling El Bimbo

CEBU, Philippines – Makahilak ug makapahinumdom sa kagahapon, pipila lang kini sa kasagaran nga reaksyon sa mga nitan-aw sa sikat kaayo nga musical play nga “Ang Huling El Bimbo”  nga gipaluyohan sa Resorts World Manila.

Ang maong musical play naghisgot sa panaghigalaay partikular na kun giunsa nila pagsagubang ang mga pagsulay nga ilang nasugatan.

Nasayran nga nagmalampuson sa miaging tuig ang “Ang Huling El Bimbo”  ug gibalik kini karong tuiga  gumikan sa panawagan sa publiko.

Nasayran padayon nga nidagsa ang mga tawo sa Newport Performing Arts Theater sa RWM aron lang gyud motan-aw sa maong musical play. Kasagaran niini ang nakuryuso sa mga positibong feedback nga ilang nabasahan kalabot sa maong play.

Kahinumdoman nga na-sold out gyud tanang pagpasundayag niini sa miaging tuig. Ang maong musical play nag-feature sa mga awit sa iconic ‘90s Filipino rock band nga Eraserheads.

Kasagaran sa mga tawo nga nitan-aw sa play ang mosabay gyud og kanta sa gi-perform sa mga artista sa entablado  busa nagpaila kini nga wala gyud nahupas ang popularidad ang mga awit sa Eraserheads.

Pipila sa mga kanta nga gikahimot-an og maayo sa Eraserheads mao ang Huwag Kang Matakot , Alapaap , Tindahan ni Aling  Nina, Pare  Ko,  Ligaya  ug Magasin.

Ang pagbalik sa Ang Huling El Bimbo: The Musical maoy usa sa kalingawan nga gidalit sa  Resorts World Manila isip pagsaulog sa  ilang 10th anniversary.

Ang maong musical play gihatagan og hustisya sa mga bituon niini nga sila si  Gian Magdangal, OJ Mariano, Jon Santos, Reb Atadero, Boo Gabunada, Bibo Reyes, Tanya Manalang, ug ang giila nga  First Lady sa Philippine Theater nga si  Menchu Lauchengco-Yulo.

Nasayran nga  nagkadako og samot ang production sa maong proyekto,  busa gidugangan  kini og  mga alternatibong  grupo nga naglangkob nila ni  - Nicco Manalo, Lance Reblando, David Ezram, Phi Palmos, Myke Salomon, Rafa Siguion-Reyna, Gabriella Pangilinan, ug  Carla Guevara- Laforteza.

Dili basta-basta ang naglangkob sa creative team niini nga gilangkoban sa direktor nga si Dexter Santos, Musical Director Myke Salomon, Associate Director Menchu Lauchengco-Yulo, Artistic Director Michael Williams, Playwright Dingdong Novenario, Costume Designer Marlon Rivera.  Gipuno usab sa grupo ang  writer-director nga si  Floy Quintos.

Kahinumdoman nga nidayeg sa maong play ang bokalista sa Eraserheads  nga si  Elly Buendia.

Tradisyon na gyud sa RWM ang paghatod og mga kalingawan sa katawhan ug mogama og mga espesyal nga presentasyon nga nag-promote sa Pinoy artists.

Aktibo kaayo ang RWM sa pag-produce og mga musical play gumikan kay tumong nila nga ipakita ang world class nga abilidad sa mga Pinoy sa pag-arte sa entablado.

Pipila sa gi-produce nga musical play sa RWM  kaniadto  mao ang   Bituin Walang Ningning nga gibidahan sa Cebuana singer nga si Monica Cuenco.  Kini usab ang nag-produce sa  Annie:The Musical   ug  Chitty Chitty Bang Bang.

Ang RWM maoy labing una nga integrated resort sa Pilipinas nag –feature og  world-class performances ug unique nga  events.

Nahimutang kini atbang sa Ninoy Aquino International Airport Terminal 3 nga makakonektar pinaagi sa Runaway Manila footbridge.  Nahimutang usab dinhi ang mga sikat nga  hotel brands nga gilangkoban sa 3,600 room gikan sa Maxims Hotel, Marriot, Hilton, Sheraton Manila Hotel, Holiday Inn Express Manila, Belmont Hotel Manila, ug  Savoy Hotel.   Mosidlak  usab puhon sa maong dapit ang  Hotel Okura.