Duha ang gihigugma

Ako si Dee ug magpatambag unta ko. Naa ko’y uyab sa layo, naa siya sa LA. Dili ko sure kung seryoso ba siya sa akoa o namulatik lang. Naa ko karon diri sa Cebu ug wa siya kahibaw nga nag- iring iring diay ko sa uban. Naglibog ko kung nganong nangita paman ko’g lain nga mas duol.

Tungod ba kaha ganahan ra ko ma-satisfy sa  akong lawasnong panginahanglan o di ba kaha layo ra gyud kaayo to akong uyab maong kinahanglan ko’g someone nga naa sa akong duol. Ang problema, dili  nako makaya nga mawala to’ng naa sa layo bisan dili mi pirmi nag-istorya.

Ganahan ra ko nga naa siya. Actually, ganahan ko nga naa sila’ng duha. Kinsa man akong pilion nila’ng duha?

* * *

Dee, ikaw pa ang gaduha-duha sa imong uyab, ikaw man diay ang angay’ng kadudahan.

Kung mamili ka kinsa imong pilion sa duha, pilia na lang to’ng imong ikaduha. Kay kung tinuoray ka’ng nahigugma atong naa sa layo nimo nga uyab, dili ka mag-iring iring. Don’t be selfish. Dili maayo nga magduha-duha ka’g uyab kay makagaba na. Be honest sa imong uyab sa LA. Kung naa ka’y mga pagduha-duha niya, ingna siya nga mao na imong gibati. Dili namo pirmi mag-istorya kay basin pud tungod rana nimo.

Basin tungod kay busy na kaayo ka. Busy na sa uban. Kung mamili man ka nila’ng duha, pilia to’ng sigurado ka nga dili ka magmahay. Dili raba tanan nimo’ng biyaan, puwede pa mabalikan. Kinahanglan gyud ka mupili kung kinsa imong gusto. Usa ra baya atong kasing-kasing, so kinahanglan nga usa ra pud kabuok ang sulod niana.

Dili ka worm nga lima kabuok ang heart. Imagine this, kung mugukod ka’g duha ka rabbits, ug maggukod ka nila’ng duha at the same time, dako kaayo ang chance nga wa ka’y madakpan sa duha.

Busy man kaayo ka og gukod nila. Pero kung mo focus ka sa usa, mas dako pa ang chance nga imo siya’ng madakpan kay ang imong huna-huna kay siya ra man. Mura ra na’g sa gugma, Dee. Usa lang gyud ang pilia. Mas happy gyud imong lovelife kung kahibaw lang ka makontento.