Love story

Dear Banat News Hugyaw,

Hello sa tanang avid readers sa Banat News, Ako diay si D, 30 years old, nagtrabaho sa usa ka restaurant ug taga Talisay City. Ako diay i-share  ang akong  last lovelife nga taudtaod na pud uy. Katapusan nako nga nauyab mao si C nga nagtrabaho isip call center agent.

Sa akong nahinumdoman nagkaila ming duha kay barkada sila sa akong classmate pag-college. Naatol pud  to nga birthday sa akong ex-classmate ug imbitado pud siya maong nagkaila mi. Sa tinuod lang nakabantay na gyud ko niya  nga magsige na siya og tan-aw nako sa dihang nagka-jam. Kay dili man ko komportable igo ra intawon ko sa pagduko.

Sa dihang naabot nako sa among balay nahibulong ko kay dunay unknown number nga ni-text nako og “hi miss guwapa kay ka, amping permi ha”.

Nagpaila dayon ang texter nga siya si C, ang bag-o nako nga naila-ila sa birthday party sa akong kanhi classmate ug niana siya nga akong classmate maoy naghatag sa akong number.

Niana pud siya nga na-attract daw siya nako. Puwerte nako og katawa kay wa ko gadahom nga uso pa diay nang linyaha. Kay wala man koy lingaw ni-reply ra pud ko sa iyang mga text hangtod nga nagka-sweet ang iyang text nako.

Wala ko kahibalo nga naabot lang og kalit ang time nga kiligon na man ko uy kun mag-text text ming duha. Sa tinuod lang lud-on gyud ko anang textmate-textmate. Pero lahi man ang among sitwasyon kay nagkaila-ila na man mi sa personal sa wala pa mi nag-text text busa dili tantong jejemon haha.

Nagkasabot mi nga magkita ug nagsagunson na gyud ang among mga date. Sweet kaayo si C. dili gyud siya masipyat pagsige og remind nako nga mokaon na.

Naabot gyud ang panahon nga nanguyab siya kanako, siyempre ako dayon siya nga gisugot kay na-develop na man pud ko niya.

Pag-abot og duha ka tuig sa among relasyon nawala na man ang gana niya nako.

Niprangka siya nako nga dapat na nga putlon ang among relasyon  kay wala na siya’y gusto nako. Ing-ana lang kadali para niya. Naningkamot ko nga dili mi magbuwag pero mao man gyud ang iyang gusto. Usa ka semana human sa among panagbuwag nag-post na siya og hulagway sa FB uban sa iyang bag-ong uyab. Laktod pagka-istorya naa na siya’y ka char-char sa dihang uyab pa mi. Naa na siya’y reserba nga babaye diay human sa among breakup, grabe gyud ang akong kalagot kaniya. Naka-move on nako sa among panagbuwag, pero dili gyud ko kalimot sa iyang pagka-walay ayo . Mo-request lang ko sa lyrics ug chords sa  All I Ask  by Adele.

Hi D! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story C/o Banat News