Ang pobre nga garboso

 “Pobre  pa gani, tikig na kaayo’g liog. Unsa na kaha’g madato,” ni Edit. “Aw, o! Unsa pa man diay,” ni Delet. Pinayam-id. Ang ilang gitumbok mao si Marley.

Sige man gud kini magdungo maglakaw. Di manglingi-lingi.

“Nagkapares gyud na sila sa iyang bana nga si Bob. Mga mahal kaayo’g katawa,” ni Edit.

Wa nila panumbalinga nga nadungog diay kining tanan ni Marley, nga nasakitan kini sa tanan nilang gipanulti.

Pagkadali rang midagan sa panahon. Misutoy lang ang napu’o ka tuig.

“Kinsa diay nakapalit anang yuta ni Inso Lada, noy Taldub?’ sugat ni Edit, ni noy Taldub nga nagsinanglay sa iyang bugsay nga nga nay gibitay nga basket sa tumoy nga gisudlan sa kuha niyang mga isda.

“Naa lagi gitukod diha nga usa ka dakong mansion?”

“Ila nang Marley, Dit.” ni noy Taldub. “Ha! Ngano gud tawo’ng nakapalit sila ana ug nakapatukod og mansion?” Budlat mata ni Delet ug Edit, uy.

“Kay kadto gung ilang anak kinamaguwangan ... kadtong gwapa, ba.” Wa pa ba gani kahuman si Noy Taldub, nisal-ot na si Edit. “Ngano man nakapamurikat og foreigner?”

“Dili! Nakadaog og 6/58 ultra lotto, jackpot,” ni Noy Taldub nga naisa ang tingog kay gilainan pod sa giyawyaw ni Edit.

“Na, mosamot gyud na sila’g kagarboso, Let,” ni Edit. Pinamug-ot nga nangalugpoy.

May niabot nga sakyanan nga sama sa kasinaw sa bakukang. Mihunong kini sa tungod nilang Edit ug Delet.

Nakita nilang mapahiyumon nga miguwa sa maong sakyanan ang magtiayong si Bob ug Marley uban sa  ilang kinamagwangang gwapa nga anak.

“Maayong buntag ninyong duha nang Edit ug nang Delet. Naa mi ihatag ninyong mama ug papa.

Mamahin mi ninyo sa among nadawat nga grasya. Kabawo na man tingali mo sa balita.” Matud sa anak ni Marley ug Bob.

Mapahiyumon pong nagyango-yango si Bob ug Marley.

“Sayop diay ta sa atong  hunahuna, Let,” ni Edit. “Mao lagi, uy,” ni Delet. “Na, angay na gyud  tingali ninyong i-delete ug i-edit, kanang inyong mga sayop nga paghukom sa pamilya nilang Bob-Marley, matud ni Noy Taldub. (Katapusan)