Ang Birhen sa Regla

Wala gyud mopatuo sa tambag si Pintoy ngadto sa iyang ginikanan nga sila si Kaldo ug Siana nga dili paggamiton sa ginadiling drugas kay makadaot kini sa iyang kaugmaon.

Usa ka adlaw niana, may nagpaingon kaniya nga usa ka babaye nga nagwali ni Pintoy.

“Dong, ang ginadiling drugas makadaot sa lawas sa tawo”, matud sa babaye. “Hinuktuki pag-ayo nga adunay Kahitas-an nga nagtan-aw kanato”.

“Dili ko motuo nianang tambag nimo!” Gipikatan sa mata ni Pintoy ang babaye.

Pagkagabii nindot ang pagkatulog ni Pintoy. Sa dihang buntag na, gibuka niya ang mga mata. Apan dili na mabuka ang iyang mga mata. Nabuta gyud siya. Nagduda si Pintoy nga usa ka balaan ang babaye ug maoy nagmugna sa iyang kahimtang. Unya sa iyang pagpinsar, nituhop ang tambag sa babaye nga dili gyud diay angay mogamit sa ginadiling drugas.

Bisan usa na ka buta, nangayo siya’g pasaylo sa babaye. Apan sa tanto niyang pangayo’g pasaylo may mabugnaw’ng hangin nga misapigad sa lawas niini. Taod-taod may nipikpik sa abaga ni Pintoy.

“Dong, kumusta na ang imong  kahimtang nga buta?” pulong sa babaye.

“Ikaw ba kadtong nagtambag kanako kabahin dili paggamit sa ginadiling drugas?” Ni Pintoy. “Mao gyud ang imong tingog”.

“Oo, ako, nakita nako nga ikaw hingpit nang nagbag-o,” sa babaye. “Ayaw kabalaka nianang imong pagkabuta, kay makakita ra ka pagbalik. Pamista unya sa Opon ug dagkot og kandila.”

Dangta’g pipila ka minutos, nawala na ang tag-iya sa tingog sa babaye. Apan sa kalit lang nahibalik na ang iyang panan-aw. Wala paabuta sa paglingi niya sa tuong bahin, may rebulto sa Birhen sa Regla nga tapad kaniya. Niluhod dayon siya sa imahen ug nisaad nga moadto sa pista sa Opon. Iyang gitutukan pag-ayo, mao gyud ang dagway sa babaye nga nitambag kaniya, ang patron sa Lapu-Lapu, mao ang Birhen sa Regla. (Kataposan)