Naluoy si Sr. Sto. Niño

Usa ka mananagat si Reynaldo. Ug may hinigugma siya nga si Merly. Debuto sila ni Sr. Sto. Niño. Unya na problema sila sa kwarta kay hapit na ang ilang kasal.

Pagkabuntag nanagat si Reynaldo duol sa isla sa Gulutongan. Namasol kini ug namasin nga daghan kuha. Unya sa tanto niyang labyog sa pasol kalit kining nilihok mao nga iyang gibira ang pasol basin nga dakong isda ang iyang makuha.

Apan sa kalit lang ningsiga ang iyang mga mata tungod kay ang iyang nakuha mao ang rebulto ni Sr. Sto. Niño. Iya kining gibutang sa iyang luyo aron makapadayon sa pagpamasol. Dangtag pipila ka segundos daghan na siya’g kuha nga mga isda. Unya sa tanto niyang pamasol sa dagat nay nabantayan si Reynaldo nga may kasikas sa iyang luyo mao nga iyang gilingi.

Apan sa kalit lang nahaigking si Reynaldo kay ang rebulto nga iyang nakita nagkaanam og kausab ang bayhon hangtod nga nahimong bata. Ug nakig-istorya kaniya.

“Kuya, nahibalo ko sa imong problema. Ayaw’g kabalaka kay daghan na ang imong kuha nga mga isda!” Matud sa bata nga nagpahiyom. “Pag-ampo sa Kahitas-an ug dagkot og kandila!”

“Bata, nagduda ko nga ikaw ang nihatag sa daghang kuha nga mga isda!” ni Reynaldo.

Pagkataudtaod nahatiurok ang ulitawo sa iyang nakita kay kilab lang nilakaw ang bata sa dagat dayong kahanaw sa iyang panan-aw.

Wala maglangan nipauli si Reynaldo sa ilaha diin naghuwat ang iyang hinigugma. Ug iyang gisugilon ang tanang panghitabo didto sa dagat.

“Merly, nia daghang mga isda ang akong nakuha. Nagduda ko nga ang bata nga akong nakita sa dagat maoy nagmugna ning tanan!” Ni Reynaldo.

“Nakaagpas nako, Reynaldo, nga ang bata maoy nitabang sa atong problema nga gipaagi lang sa daghang kuha nga mga isda. Ug malahos na ang atong kasal!” Ni Merly. “Kinahanglan nga moadto ta sa pista sa siyudad sa Sugbo kay natahap ko nga si Sr. Sto. Niño naluoy kanato!” (Kataposan)