Ang babaye sa linaw

Nangadlawon si Pedot sa pag-adto sa linaw sa Candangas, niining dalikyat niyang pagbakasyon sa sityo nga nahisakop sa baryo Caduawan, nga maoy unang namat-an niya’g kahayag ug diin siya nagdako.

Mikabat na sa 20 ka tuig nga wa na siya makabalik sa ilang sityo. Nahigapos siya sa iyang trabaho nga scriptwriter sa mga drama sa radyo ug salida sa telebisyon nga teleserye sa siyudad.

Nakuryuso siya sa gitaho kaniya ni Nang Celina, ang magulang niyang babaye nga nabiyuda na ug maoy nag-amuma sa kabiling parsela nga banika.

“Oo, anaa gihapon ang linaw sa Candangas, Dot! Tin-aw gihapon ang tubig niini nga gikan sa dinagayday sa bul-og sa sapa. Mora’g swimming pool gihapon nga gihimong kaligoanan ug labhanan sa mga lumupyo. Apan duna lay katingad-an nga maligo matag alas-4 sa kadlawon. Usa ka guwapa ug puti’ng babaye nga maligo sa linaw matag kadlawon. Matud pa sa manalagna ug tambalan, usa kuno ka engkantada! Ug kalit lang sab mahanaw sa linaw!”

“Ha? Engkantada? Anaa gihapoy engkantada ning panahona karon, Nang Lina?’ “Ay, oo, Dot, uy! Labong kakahuyan gud ang atbang sa linaw nga maoy pinuy-anan sa mga engkanto!

Apan way lalaki sa atong sityo nga nangahas sa pag-ila-ila sa maong babaye sa linaw! Maligo ra ba nga hubo ang tibuok lawas!”

“Mao ba? Gibati ko’g kursonada nga makita ang maong babaye sa linaw!”

“Aw, tingali’g sa edad mo karon nga 40, Dot, nga nagpabiling ulitawo sa siyudad ug sikat nga scripwriter sa drama sa radyo ug teleserye sa TV, ikaw ray makauyab nianang guwapang engkantada kay, guwapo man sab ka!”

Nagpasalipod si Pedot sa dakong punoan sa bangkal, daplin sa linaw. Atol nga may bulan ang kadlawon nga naghatag og kahayag sa linaw.

Nahaulpot si Pedot sa iyang gihup-an, dihang nabantang sa iyang panan-aw ang usa ka matahom, puti ug porma kaayo’g lawas nga babaye nga nagsul-ob og nipis kaayong bestida’ng puti.

Sus, misihag ang bra ug panti niini. Milurat ang mga mata ni Pedot dihang gihukas na sa babaye ang nipis niya’ng puti nga bestida, lakip na ang bra ug panti niini. Nabantang ang kabigot sa lawas sa puti ug matahom nga babaye nga hubo na ang lawas.

Nakapanglad-ok si Pedot. Sa siyudad, napul-an na siya sa daghan niyang uyab nga porma gihapon ang mga lawas nga pulos na niya natilawan.

Apan karon, nabatobalani siya sa katahom sa babaye sa linaw nga nag-atubang sa iyang gihup-an nga punoan sa bangkal ug nagpangamay pa niya.

Nakit-an diay siya. Gilamat si Pedot sa engkantada! Ug mao na lamay iyang nabantayan, nga paspas siyang naghubo sa tanan niyang sapot ug mitimpasaw dayon sa tubig sa linaw, aron sination ang talagsaon niyang pagpakigromansa sa usa ka engkantada niadtong kadlawon nga nagpangamay kaniya! (Katapusan)