Tambal sa kabalaka

Alas 6:30 sa buntag. Pauli na gikang nag-hike si Celso. Pag-abot niya tungod sa Luyang Elementary School, may nibusina niya nga nagmotorsiklo. Riding in tandem nga puro nag-helmet. Nagwarawara niya ang duha. Giwarawara na lang sab niya. Niurong siya’g lakaw ug gisundan niya’g tan-aw ang motorsiklo.

Nahinumdum siya nga sila diay to si Jezreel ug si Sheena mga magtutudlo sa Carmen National High School. Magtiayon. Si Sheena iyang kamaguwangang anak. Moadto sila sa Daanbantayan. Unya samtang nagtan-aw sa nagkalayong motorsiklo, niturok ang kabalaka ni Celso. Kay bisa’g unsa ka maayong laki sa magmaneho sa motorsiklo, kabi’g gihapon sa disgrasya. Gibati siya’g kahadlok ug kasubo nga naghunahuna sa panaw sa iyang anak ug umagad.

Clerk si Celso sa opisina sa Tasador. Si Nova naninda og sarisari duol sa gate sa Carmen Central School. Nakapanghupaw si Celso nga nitalikod. Nipadayon og lakaw. Mabalak-on gyud kaayo siya. Sa gamay pa siya, mabalaka siya’s iyang mga ginikanan kun dunay biyahe. Dihang minyo na siya, duna nay mga anak, ang mga anak na sab iyang kabalak-an. Sila si Sheena ug Sheryl. Didto sila’s siyudad sa Sugbo nagtungha sa kolehiyo. Kada adlaw biyahe og 40 kilometros, balikbalik. Mapasalamaton siya’s Diyos nga wa gyud sila kaagi og disgrasya. Si Sheryl minyo na sab.

Pag-abot ni Celso sa ilang balay duha ka gatos ka metros luyo sa munisipyo, nagtan-aw na’g TV sila’s Fiona ug Hera, iyang mga apo nga anak nilang Sheena ug Jezreel. Nangamin dayon sa ilang lolo. Nagdigamo na si Nova sa ilang pamahaw. Nisaka siya’s ikaduhang andana sa ilang balay aron mag-ilis sa ilang lawak. Paghuman og ilis, niluhod siya atubangan sa altar. Kinasingkasing nga nag-ampo. “Diyos ko, panalipdi akong anak ug umagad. Ilikay sila sa disgrasya. Isalig nako sa imong gahum ang ilang kinabuhi”, ni Celso. Nagpiyong.