Gahum sa gugma
“La, mora man hinoon ko’g gikulbaan nga nagkaduol na ang adlaw nga mosalmot na ko sa Tawag Ng Tanghalan” ni Fiona, 18 anyos, estudyante og mass communication. Nibaiid siya’s iyang Lola Mira nga mapinanggaon kaayo niya.
Ang iyang lola maoy namat-an niya’g buot nga nag-atiman niya gikan sa nursery pa siya hangtud nga grade 5 na. Maong attached kaayo sila sa usa’g-usa. Kay ang iyang mga ginikanan, wa pa nadawat nga magtutudlo, mga call center agents. Naglabi ang gabii sa ilang trabaho. Unya maadlaw makatulog.
Mahiligon sila’g musika. Iyang Lolo Hernan motukar og piano. Mogunit sab og sista. Mokanta og mga standard songs.
Iyang Lola Mira, mga kanta ni Karen Carpenter ang master. Iyang papa’g mama maayo sab manganta. Kun dunay mga okasyon sama sa birthday, di masipyat nga mag-sing-along iyang mga apohan ug iyang Papa Jezreel ug mama Sheena.
Lakip sab si Fiona nga nabansay na sab sa pag-awit. Iyang mama ang anak sa iyang Lolo Hernan ug Lola Mira.
“Ang akong ikatambag nimo, Inday, be determined and confident. Find your strength in love” sa lola niya. Gihapuhap ang ulo ni Fiona. “Mora man na’g wordings sa kanta”, ni Fiona. “Gahum sa gugma.
Mawala imong kulba. Una, higugmaa imong kaugalingon. Sa paghigugma sa imong kaugalingon, gihigugma sab nimo ang Diyos, kay lalang ka sa iyang larawan. Higugmaon nimo imong kanta, ug ang imong pag-arte sa pagkanta. Higugmaon nimo ang audience, ang madlang people, ang mga judges ug ang mga hosts. Ihalad nimo nilang tanan imong awit.
Haranahi sila. Tumana ni. Mahanaw imong kulba. Ug mogawas imong natural nga talento”, sa apohan. Puno sa kaaghop sa apo.
“Sa ato pa, la. I’ll find my strength in love,” ni Fiona. “That’s correct, Inday. Naa na sa awit nga The Greatest Love Of All”, sa apohan. “Salamat kaayo, la. Timan-an nako imong tambag” ni Fiona. Nigakos sa iyang lola. Gihapuhap sa apohan ang bukobukto sa apo. Puno sa pagpangga. - Alcea Maningo - Cangyan, Carmen, Cebu (Kataposan)
- Latest
