Ato ra ni

Attorney, unsa man gyuy tan-aw nimo sa akong manghod nga pari? sukot ni Ponso sa iyang abogado nga si Atty. Rolly Agajad.

Nag-atubang sila’g lingkod ning alas kuwatro sa hapon atbang sa munisipyo sa lungsod sa Barili. Nakapangutana si Ponso sa abogado kay bestfriend ang abogado ug ang pari. Kauban sa seminaryo sila si William ug Rolly. Si William manghod ni Ponso, nadayon pagkapari. Si Rolly, hapit na maordinahan apan nibiya sa seminaryo ug nikuha’g abogasya. Na abogado.

Dunay kaso si Ponso, kay gikiha og kasong ejectment sa tag-iya sa yuta nga gitarokan sa iyang tindahan. Si Father William ang nagrekomendar og abogado, unya, nabaniog na kaayo ang tabitabi libut sa parukya ni Fr. William nga kono ang pari dunay uyab nga nanghukhok niya. Hangtud natental ang pari sa pagpangawkaw sa salapi sa simbahan.

Mura’g nakatuo si Ponso nga may uyab iyang manghod nga pari kay kun  mobisita’s balay sa ilang ginikanan sa probinsiya, dunay serbis. Kay di kamao momaneho og sakyanan ang pari, babaye ang iyang drayber. Seksi kaayo nga babaye. Unya, mag-uban sila’g katulo’g sa usa ka lawak sa balay sa ilang ginikanan.

“Bayot man na si Father William?” ni Rolly. “Ah, di ko motuo nga bayot si Padre. Mas motuo ko nga playboy siya” ni Ponso. “Dugay man ming kauban sa seminaryo. Hapit unom ka tuig. Nakat-on to si Fr. William nako nga kun duna siya’y sekreto, di gyud niya ipamahin. Dili siya angay moingon nga ‘ato ra ni’. Kun moingon siya nako ‘ato ra ni’, pakgangon ko dayon siya pag-ingon. Imo ra na. Ayaw ipamahin” ni Rolly.

Nakasabot si Ponso nga dili mokomentaryo ang abogado mahitungod sa pari. Nakapahiyom siyang nitutok sa abogado nga naglingkod atbang niya sa lamesa.

“Kun naa kay sekreto, kinahanglang imo ra gyud na. Kay kun duna nay laing nasayod, dili na na sekreto” sa abogado. “Bilib gyud ko nimo, attorney. Abogado gyud ka” ni Ponso. Mapahiyomon. Niapir sa abogado.  Alcea Maningo - Cangyan, Carmen, Cebu(Kataposan)