Ganansiya matag putahe

“Day? Pila man gyud ka kilong talong imong isugba matag adlaw?” matud sa tawo nga sayisintahon og pangidaron. Hapit tulo ka bulan na ang tawo nga kada buntag mag-hike ug moagi duol sa karenderya nga gipanag-iya sa iyaan ni Sally.

Si Sally ang tigsugba og talong matag buntag, sa aseras sa Gorordo Avenue, diin nahimutang ang karenderya. Unom ka bulan na nga silbedora si Sally sa karenderya sa iyang Tiya Ofelia. Maagian ug makit-an gyud siya sa tawo nga mag-hike padulong sa Ayala unya mabalik padulong sa Sudlon. Karon, alas singko i-medya sa buntag, niurong ang tawo ug nagbarog sa aseras, tungod sa sugbaanan ni Sally.

“Lima ra man ka kilo, sir. Unya way labot Domingo. Kay wa may customer kun Domingo. Kasagarang mangaon dinhi mga trabahante sa mga construction sa mga building gitukod dinhi’s duol”, ni Sally. “Pila man ka putahe ang lutuon nimo kada buntag?” sa tawo. Nanarapo sa singot ginamit ang basang t-shirt. “Dili man akoy tigluto, sir. Pero ang akong iyaan, maoy moluto og lima ka putahe.  Humba, beef steak, adobong manok ug mga tortang talong,” ni Sally.

“Pila may ganansiyahon kada putahe?” sa tawo. “Usa ka gatos ra man kada putahe. Kinyentos tanan, matag adlaw” ni Sally. “Hmmm!” Nakahikap sa suwang ang tawo. Unya nipadayon sa iyang lakaw.

Gisundan og tan-aw ni Sally ang tawo. Nakapahiyom siya. Kay nakatuman gyud siya’s pahimangno sa iyang Tiya Ofelia. Nga kun dunay mangutana mahitungod sa ilang mga paninda, kinahanglan dili gyud sultihan sa tinood. Kay basi’g masuya sa ilang negosyo. O kaha basi’g tagagobiyerno. Pangitaan sila’g  mga permit. Posible sab makigkompetensiya unya. Kay sa pagka tinood, kinyentos pesos ilang ganansiya matag putahe. (Kataposan) - Chito E. Germino - Paknaan, Mandaue City