Maningo

“Kinsa may namatay, “bay?” ni Doming, sekyu sa Amiraw Central School, pag-agi niya ning sayong kahaponon padulong mo-duty.

Ang iyang gipangutana si Boyax batabata sa barangay kapitan sa Poblasyon, nga kasamtangang nagmontar og tolda sa grahean sa balay ni Mira. Wa pay sakyanang gigrahe kay kasamtangan tua pa sa opisina si Rudy, bana ni Mira nga usa ka CPA.

“Ambot!” tubag ni Boyax. Nakapanglingo. Nakaingon sa iyang hunahuna nga kun dunay magtaod og tolda, namatyan gyud siya. Parabilar lang gyud diay ang tolda? Nisaylo si Doming. Nihangyo si Mira sa barangay kapitan nga manghuwam sa tolda nga serbis sa barangay. Domingo pa gamiton. Sa petsa 11 sa Disyembre. Apan Biyernes pa sa hapon karon, gimontar na ni Boyax. Kay duna siya’y lakaw sa Sabado ug Domingo.

Ang balay ni Mira nag-atubang sa dalan Borja nga naglatas gikan sa luyo sa munisipyo sa silangang tumoy ngadto sa gate sa Amiraw Central School sa kasadpang tumoy. May tindahan si Mira duol sa gate sa eskuylahan. Himalitan kaayo ni nga tindahan tungod sa mga tindang duwaan nga barato kaayo. Ginganlan gani’g “White Store” sa mga bata.

Kasamtangang wala si Mira sa ila. Kay dunay gipamalit sa merkado kauban ni Lenlen iyang katabang. Igo gyung  nahuman ni Boyax og montar ang tolda, niabot si Mira ug Lenlen.

“Maayong hapon, ma’am. Sakto ra ning pormaha sa pagmontar sa tolda?” ni Boyax. (Nag-ma’am siya kay retirada nga magtutudlo si Mira). “Sakto ra kaayo, Boyax. Domingo pa man unta ni gamiton” ni Mira. “Karon lang nako gimontar. Kay di ko kalugar sa Domingo” ni Boyax. “Salamat ha” ni Mira. “Kinsa konoy namatay, ma’am? Nangutana ang guwardiya nako ganiha” ni Boyax. “Simbako tawon oy! Buang man nang guwardiyaha. Di na lang gyud diay ta kapataod og tolda kun way mamatay? Birthday sa akong bana, anak ug pag-umangkon. Giusa ilang selebrasyon,” ni Mira.

“Unsa god diay” ni Boyax. Nakapahiyom. Nangawot sa  ulo. “Anhi unya paniudto o panihapon. Kun makalugar ka” ni Mira. “Kun makauli ko’g sayo gikan sa akong lakaw” ni Boyax. (Kataposan)