Kasosyo

Alas sayis sa kilumkilum. Nanilhig na si Hector sa  mga buhok nga nagpasad sa sawog sa Green Meadow Barber Shop. Kiwaw tan-awon iyang lihok kay nagsaguyod iyang walang tiil.

Dili barbero si Hector apan obligado siyang manglimpiyo sa barberiya. Kay ang iyang newsstand nia sulod sa barberohan. Ang barber nga nag-abang dinhi si Melvin nga kasamtangang nitimo o nanihapon og sayo.

"Tor, hain na man ang akong gipreserbar nga Banat News?" ni Ponso nga drayber og mini-bus biyahe og Carmen-Cebu. Nagtunol ni Hector og coin nga P10. Nakugang og nakanganga si Hector kay wa na siya magdahum nga kuhaon pa ni Ponso ang mantalaan."Ako laging nabaligya og lain. Kay gabii na god ron. Abi nako'g di na nimo kuhaon" ni Hector nga nikanga ug nagminghoy. "Kabuang ba sab nimo! Alas sayis pa ko's buntag nagpareserba nimo. Unya imo na hinuong gihatag og lain!" ni Ponso nga nibakyaw sa tuong kamot ug nihana og sagpa ni Hector. Nanabon sa nawong si Hector. Init gyud og ulo ni si Ponso. Gaan sab og kamot. Apan wa niya idayon kay nakita na niyang nagpadulong si Melvin.

"Unsay problema bay Ponso? Nga mora man ka'g kahambaton ni Hector nga akong kasosyo sa barberohan?" ni Melvin. Sosyo lang si Hector sa espasyo. Apan way abang. Kay kahago sa pagpanglimpiyo iyang tampo. Si Melvin black belter sa Taekwondo. Tataw sa iyang solid nga lawas nga way abs. "Ah eh. Kuan bay. Nagmahay lang kong Hector.

Kay gibaligya og lain ang gipareserba nako nga Banat News" ni Ponso. Nikanga ug nalumo ang tono. "Unsa mang hitaboa Tor nga wa nimo respetohi ang pagpareserba ni Ponso?" ni Melvin. "Ah, dugay man god niyang gikuha. Pagka alas singko, duna may nangita. Ako na lang gihatag," ni Hector.

"Unsa man diay'ng orasa  imong saad bay Pons? Nga kuhaon nimo ang gipreserba?" "Niingon ko nga kuhaon nako karong udto," ni Ponso. "Ah, paso na bay. Gabii na man ron" ni Melvin.

"Pasensiya na bay. Di na mausab," ni Ponso. Nitan-aw sa sawog. (Kataposan)