Nahigugma si Masoy sa dalagang engkanto

Dunay dako ug karaang kahoy sa balugo nga matag gabii punsisokan sa mga aninipot atbang sa balay nilang Teban-Pasyang. Sila si Teban ug Pasyang dunay anak ulitawo, si Masoy.   

Hinganta kaayo kini si Masoy nga bisa'g halawom nang gabii molanog ang iyang awit nga siya ra poy moduyog sa iyang gitara. Kausa dihang nangatulog na ang iyang nanay Pasyang ug tatay Teban misulbong sa mingaw nang kagabhion ang awit ni         Masoy.

Nindot gyud hinuo'g tingog kini si Masoy nga kun imo gyong paminawon, labi mga binisayang awit ang iyang awiton, mahinumdom ka sa mga karaang haranista nga Sugboanon nga maayo kaayong mokanta.

 "Maayong gabii, puwede makadayon," usa ka babaye nga guwapa kaayo ang nasugat sa panan-aw ni Masoy. "Ako si Ederliya, ug silingan ra ta. Naa ra sa atbang ang among balay. Gusto ko nga mahimo tikang higala, ha, Masoy. Dugay na man kong nakaila nimo kay silingan gud ta. Okey ka ba, nga mahimo ko nimong higala sukad karong gabhiona?"

"Aw, o, uy, okey ra, okey kaayo, kinsa toy imong ngalan?" ni Masoy nga miigham-igham.

"Ederliya," mubong tubag sa dalaga.

Gikan niadtong gabhiona mag-anhaan na si Ederliya sa balay nilang Masoy matag lawom nang gabii. "Ederliya, ayaw lang og kasuko, kay ning gabhiona gusto ko nga masayod ka nga ako nahigugma nimo..."

Mipahiyom lang ang dalagang engkantada. Ug namulong kini agi'g tubag kang Masoy. "Masoy, kun tinuod kang nahigugma ka nako, mokuyog ka nako karon didto sa among balay, sa among palasyo diha sa atbang ... tana, kay hapit na ra ba mo-alas kuwatro sa kadlawon. Dali kupti akong kamot..." Ug nanaog sila sa silong.

Pagka ugma, gipangita si Masoy ug  wala na nila makita pa ang ulitawo.

Apan matag Biyernes magpakita si Masoy sa  iyang nanay ug tatay apan kadali ra ug inig lakaw ni Masoy binlan gyod niya'g mga alahas nga bulawan ang iyang mga ginikanan. (Kataposan)