Salingsing

Migitib ang matahom nga gugma nga daw salingsing

 Sa usa ka matahom nga kahoy.Unang awit maoy naghatod

Sa mga pinitik nganha sa imong kasingkasing

 Ayaw pagduda kay dili ko ikaw pahilakon

Bisa’g matapos pa ang dagayday sa buhing sapa

Nga maoy tagoangkan sa akong mga luha.

Oo, ang katuigan daw ang wanang diin kitang duha

Nagdagan sa mangitngit nga lapyahan. Milangoy ka,

Gigukod ko ikaw. Mikatawa ka. Mibawos ka paggakos

Ug naanod tang duha sa dinadapyadapya sa mga balod

Ug wala damhang ang atong duha ka kalag

Naghigda na sa puting bunbon.

Kaanindot handumon sa kagahapon, Eloisa

Apan ang tanan diha na lang sa patay’ng handumanan

Sa wala na magkasinabot tang mga lakang,

Ikaw anaa na sa laing mga bukton, ug ako pahilayo

Sa atong baybayon...

Apan dili instrumento sa kapakyas kining pagpahilayo

Ko, kay sayod kong buhi sa tanang panahon ang gipangga

Tang kahoy sa bungtod ug bisan pa sa paglun-os sa

Ilang mga dahon duna gihapo’y pinitik sa kasingkasing

Nga nahinugon ug kini hinayhinay’ng migitib aron mahimong bag-ong salingsing...

#HUGOT

Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan?  Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo ka na nga ipabuhagay pinaagi sa pagbalak!

Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma.

Ipadayag ang imong HUGOT sa gugma! Ipadala   pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:

HUGOT BALAK

C/o Banat News  V. Gullas St., cor. D. Jakosalem St.

Barangay Santo Niño 6000,

 Cebu City,  Philippines