Snr. San Roque nagmilagro
Mura'g batang gamay nga giilogan og duwaan si Divina gumikan sa trahedyang nahitabo sa kamagulangan niyang anak. Naluoy na pag-ayo si Honeyline sa iyang inahan nga kanunay maghinuktok.
"Ginoo nganong nahitabo man kini sa akong anak, ngano man?" dangoyngoy ni Divina. Naligsan si Justine sa naghaguros nga bus, nadagit ug nagkatag ang baligya niyang budbod kabog sa dalan. Nakabsan gyud sa kinabuhi ang dalagita.
"Ma, wala na si ate Justine, manarbaho ko, manimpad ko, magpa-maid ko sa Catar aron makatabang sab ko ninyo ni tatay ug sa akong mga manghod."
"Unsa! Catar, kalayo ato anak, dili ko mosugot bahala'g wa tay kuwarta basta magtapok ta," pulong pa ni Divina.
"Sos! mama baya P200 ra man gud nay plete gikan sa ato mamorang ko og danggit didto, naa man koy amiga taga didto man ma. Sa Catarman Cordova kusog man kuno ron kay inangat ilang pista," pulong pa ni Honeyline.
Sayo nigikan si Honeyline gikan sa Bogo paingon sa Catarman Cordova. Pag-abot sa Pocherohan Mandaue nisakay na usab siya'g multicab paingon sa Lapu-Lapu para moabot sa Catar. Nilabay ang mga katuigan nakatigom na siya.
Kalit ni ring iyang selpon ug may dautang balita sa iyang pagbasa: napatay iyang manghod sa engkuwentro batok sa kapolisan. Daghang drugas ang nakuha. "Ma, wala na si dodong JM ayaw palabi'g kaguol, anaa pami ni inday Geraline nagkinahanglan nimo, mag-unsa man mi kung wala na ka?" ni Honeyline nga mihapuhap sa iyang mama.
Ilang gidala si Divina sa ospital kay kalit nakuyapan unya ilang nasayran sa doctor stage 4 cancer na sa dughan ilang inahan.
Nanugon na si Divina ug naghingutas na sa iyang gininhawa. "Snr. San Roque, luwasa ang akong inahan dili pa mi andam nga mawala siya kanamo."
Unya may nibuak sa kahilom tungod kay may nanuktok. Daling giablihan ni Geraline ang pultahan ug may usa ka tiguwang nga lago ug bungoton, may dalang iro nga nangayo og tubig.
Human nakainom nilakaw ang tiguwang. Ug kalit nibangon si Divina,nangayo'g tubig. Gimilagrohan ang ilang inahan. (Kataposan)
- Latest
