Iuli ko ang mga halok

Miabot gyod og usa ka tuig ang ilang relasyon ni Shirly. Ug ning pipila ka mga adlaw’ng nanglabay nabatyagan niyang dili na kaayo init ang mga halok ni Shirley kaniya. Gani, niadtong usang adlaw dihang nanan-aw sila’g sine, nindot unta ang salida kay sila man si Gerald Anderson ug Arci Muñoz ang nanagdala sa mga bida sa maong pelikula. Love story nga may pagka-comedy og gamay. Apan dihang iyang gihagkan si Shirley wala na kini mobawos ug igo na lang nga nagpatara. Gibuwagan siya ni Shirly.

Dugay na kadto ug karon usa na siya ka inilang abogado sa siyudad.

“Bert, nia ko kay magpatabang ko  nimo. Ang akong bana nabilanggo sa kaso nga pagpayuhot og ginadiling drugas,” kahilakon si Shirley nga nagpaabot sa tubag ni Bert.

Gitutokan niya ang kanhing hinigugma nga wala makaharong pagtutok kaniya. Nakaila siya sa bana niini, si Alexis nga maoy hinungdan nga gibuwagan siya usa kadto ka hapon didto sa usa ka restawran. Ug mihinay siya pagsulti, “Shirley, daghan mang mga abogado dinhi  sa siyudad, nganong ako man, ug kanang kaso sa imong bana usa ka bug-at nga matang sa kaso karong panahona, daghan nang nawad-an og kinabuhi niana ... ug ang ikasulti ko lang, Shirly, nga pangita la’g laing mokupot sa kaso sa imong bana, kay sa pagka karon daghan  kaayo ko’g mga kaso nga gikuptan, ug dili na nako maato...”

“Tungod ba niadtong higayon nga gibugto ko ang...” medyo may ganay sa kasubo ang tingog ni Shirley.

“No, no, dili. Wala na to, naka-move-on na ko, dugay na. Ug walay personal nga butang nga akong gipadayag kanimo karon,” miira’g si Bert sa lingkoranan sa iyang lamesa. Ug iyang nakita nga mihinay’g tindog si Shirley ug mihinay’g gawas sa iyang law office.

Ug didto sa iyang kasingkasing may mga luha nga dili makita apan iyang nabatyagan ug kini mao kadtong mga halok nga dili na init gikan kang Shirley ug  kini iya nang gikauli karon. (Katapusan)